Qysylǵan janǵa der kezinde jetip, kómek qolyn sozý – boryshymyz – meıirger
ORAL. KAZINFORM – Kez kelgen ýaqytta qysylǵan janǵa der kezinde jetip, kómek qolyn sozý – boryshymyz. Gıppokrat antyna adal bolyp, kúndelikti qyzmetimizdi atqara bilsek, odan asqan abyroı joq. Bul týraly Kazinform tilshisine Terekti aýdany Saryómir dárigerlik ambýlatorııasynyń meıirgeri Almagúl Salahıeva málim etti.
BQO Densaýlyq saqtaý basqarmasynan túsken málimetke qaraǵanda, oblysta tótenshe jaǵdaı jarııalanǵan kezdegi oqys oqıǵa bylaısha órbigen.
Bıylǵy 2 sáýirde saǵat 17.00-de Terekti aýdany Ańqaty dárigerlik ambýlatorııasyna Rybtseh aýylynyń Kosta qystaǵynda 1979 jylǵy er adamnyń júrek tusy shanshyp, beti isinip, esten tanyp qalǵany jóninde habar túsken.
Habar túsken boıda Ańqaty dárigerlik ambýlatorııasynyń meıirgeri Elmıra Ǵumarova Terekti aýdandyq №2 aýrýhanasy dırektorynyń emdeý isi jónindegi orynbasaryna eskerte otyryp, traktor kóligimen jolǵa shyqqan. Alaıda kólik júre almaı, atalǵan shaqyrtý oblystyq Densaýlyq saqtaý basqarmasy basshylyǵynyń baqylaýyna alyndy.
Basqarma basshysynyń orynbasary Gúlnár Ábdirahmanovanyń tapsyrmasymen oqıǵa jóninde tótenshe jaǵdaı departamentine habarlandy. Áýe kóligin (tikushaq) bólý múmkindigi bolmaǵandyqtan, Saryómirden Rybtseh aýylyna barýdyń jalǵyz joly Shalqar kóli arqyly jetý jaǵdaıy qarastyryldy.
Saryómir aýyldyq okrýgi ákimdigimen birlesip, tótenshe jaǵdaı departamenti qyzmetkerlerimen sý arqyly barýǵa ruqsat alý, alda kútip turǵan qaýip-qater: seńniń júrýi, sý aǵysynyń qattylyǵy, mı batpaq, túnge qaraı atalmysh sapardyń (Shalqar kólimen eki ara – 16 shaqyrym) barý men kelý ýaqytyn eseptegende, 6-7 saǵatqa sozylatyny talqylandy.
Sóıtip, mańyzdy shara Saryómir dárigerlik ambýlatorııasynyń meıirgeri Almagúl Salahıevaǵa tapsyryldy. Esh oılanbastan kelisimin bergen meıirger saǵat 19.40-ta qutqarýshylarmen birge jolǵa shyqqan.
«Bala kúnimnen Shalqar kóli jaǵasynda, Rybtseh aýylynda óskendikten, asa bir qorqynysh bola qoıǵan joq. Alaıda qarańǵy túsip ketkendikten, áýeli katerdi jaǵadan sýǵa jetkizý, sodan keıin muzdardyń arasymen júrip otyrý qıynǵa aınaldy. Qutqarýshylar Batyrbek Saǵyntaev pen Nurken Aldııar ózim sııaqty Rybtsehtan, al Altynbek Qapashev Shalqar aýylynan, olar da osy tóńirekti jaqsy biledi. Bir-birimizdi túsinip, jaılaıtyn jerde jaılap, qozǵalyp otyrdyq. Alǵan baǵyttan qaıtpaı, jetken kezde aýyldyń ishi mı batpaq eken. Naýqasty qaraǵan kezde tańdy kútpeı, jaǵdaıy qıyn bolǵandyqtan, ony alyp, jedel keri qaıtý kerek boldy. Endi basqa jolmen, ıaǵnı Shalqar aýylyna qaraı júrdik. Sol jerde kútip turǵan jedel járdem kóligimen túngi saǵat 02.00-de naýqasty Saryómir dárigerlik ambýlatorııasyna jetkizdik. Osy qıyn sapar kezinde birge bolǵan qutqarýshy jigitterge alǵysymdy aıtamyn», - deıdi A.Salahıeva.
Budan keıin ambýlatorııada er adamǵa alǵashqy dárigerlik kómek kórsetilip, EKG-ǵa túsirgennen keıin oblystyq kardıologııalyq ortalyq mamandarymen keńese otyryp, Oraldaǵy qalalyq kópbeıindi aýrýhanasyna jetkizý týraly sheshim qabyldandy. Naýqas Terekti aýdandyq №2 aýdandyq aýrýhanasy dırektorynyń orynbasary Saıagúl Adenovanyń bastaýymen tańǵy saǵat 04.00-de qalaǵa jetkizilip, kardıolog mamandarǵa tapsyryldy. Er adam tıisti emin alyp, qalalyq kópbeıindi aýrýhanadan 10 sáýir kúni jazylyp shyqty.
«Eń bastysy, syrqattanǵan janǵa der kezinde kómek kórsetilip, tóngen qaýip-qaterden aman qaldy. Mundaı oqıǵalar kúndelikti ómirde kezdesip turady. Qandaı jaǵdaı bolmasyn, qysylǵan janǵa kómektesip, medıtsınalyq qyzmetimizdi durys atqara bilý – bizdiń boryshymyz», - deıdi meıirger.
Eske sala keteıik, budan buryn Batys Qazaqstanda Jaıyq ózeninde 7 adamnyń qutqarylǵanyn jazǵan bolatynbyz.
