Kisi tonaý maqsatynda adam óltirgen qylmystyń beti ashyldy
ALMATY. Tamyzdyń 26-sy. QazAqparat - Omarov kóshesinde ornalasqan jeke turǵyn úıdiń qojaıyny men onyń dosy qylmyskerlerdiń qurbanyna aınaldy. Qylmystyq istegi málimetterden belgili bolǵandaı, ishimdikke áýes, maskúnemder jınalatyn Alekseıdiń úıine túngi on birler shamasynda eki er azamat kelgen. Beıtanys ekeý aldymen úı ishiniń astan-kesteńin shyǵaryp, odan keıin úı ıesi men onyń qonaǵynan baǵaly zattar men aqsha talap etip, aýyr soqqyǵa jyqqan, dep habarlaıdy ІІD baspasóz qyzmeti.
«Qatty uryp-soqqannan keıin qaskóıler pyshaq shyǵaryp, óltirem dep qorqytqan. Alaıda bul kezde páter ıesi jantásilim etken edi. Osyny baıqaǵan qylmyskerler kýágerden de arylmaq bolyp, ekinshi adamnyń ishine pyshaq suǵyp alǵan. Degenmen de ýaqıǵa ornyna tez arada kelip jetken jedel járdem qyzmetkerleri 44-jasar V. esimdi azamattyń ómirin saqtap qaldy. Ózine kelip esin jıǵannan keıin ol oqıǵanyń mán-jaıyn jáne qylmyskerler jaıynda naqty málimetter berdi»,- dep atap kórsetti Jetisý aýdandyq ІІB bastyǵy, polıtsııa podpolkovnıgi Qanat Taımerdenov.
Jábirlenýshi men qaza bolǵan adamdardyń ómir súrgen ortasy men aınalasyndaǵy adamdardy tergeý barysynda, olardyń buryn birneshe ret sottalǵan tanystary bar ekendigi anyqtaldy. Alekseıdiń úıinde baǵaly zattar bolmasa da bul kisi ólimi tonaý maqsatynda jasalǵandyǵyn da joqqa shyǵarýǵa bolmas.
«Jalǵyz kýágerdiń bergen málimetteri tergeý amaldarynyń jalǵasýyna kóp septigin tıgizdi. Jedel-izdestirý is-sharasy nátıjesinde biz Shyǵys-Qazaqstan oblysynyń eki turǵynynyń izine tústik, onyń bireýsi buryn kisi bopsalaǵany jáne qylmysyn jasyrǵany úshin 6,5 jyl jazasyn ótep kelgen ákki qylmysker bolyp shyqty. Quryqtalǵandardyń ekeýi de Almaty qalasynyń Jumabaev kóshesinde páter jaldap turyp kelgen. Qazirgi tańda biz ShQO-tyq áriptesterimizben baılanysyp, ustalǵandardyń óz elinde jasaǵan qylmystary týraly da málimetterdi berýlerin surap otyrmyz»,- dep málimdedi Qanat Taımerdenov.
Sonymen qatar shyǵystan kelgen qonaqtar Ortalyq kıim bazarynda biraz ýaqyt júk tasýshy bolyp jumys istegenderi belgili boldy. Mundaı azyn-aýlaq tabysqa qanaǵattanbaǵan olar qylmystyq jolmen mol aqshaǵa kenelmek bolady. Tergeýshilerdiń aıtýyna qaraǵanda olar Almaty qalasynda budan da aýyr qylmystardy jasaýy múmkin degen boljam aıtýda.
