Kishkentaı tennısshiler Qazaqstan kýbogynan 15 myń dollar tabys tapty
ASTANA. QazAqparat - Astanada 12 jasqa deıingi balalar arasynda Qazaqstan kýbogynyń komandalyq dodasy qorytyndylandy. Úshinshi ret ótkizilip otyrǵan týrnırdiń aıasy bıyl birshama keńeıip, 14 oblystan 18 komanda qatysty, dep habarlaıdy QazAqparat SPORTINFORM-ǵa silteme jasap.
Almaty qalasy men elorda ekeýden komanda shyǵardy. Komandalardyń árqaısysynda 4 ul, eki qyz jáne eki kapıtannan boldy.
«Balalar ótken jyldardaǵy týrnırlerge qaraǵanda bıyl meılinshe sapaly oınady. Eki jyl burynǵymen salystyrǵanda bıylǵy deńgeıi joǵary boldy», - deıdi bapker Aıa Ospanova.
Týrnır qorytyndysyna saı, 7 000 dollar mólsherindegi bas júlde «Almaty-1» komandasyna buıyrdy. Al Astana-1 komandasy kúmis júldeni ıemdenip, 5 000 dollarǵa ıe boldy. Úshinshi orynǵa qol jetkizgen Qyzylorda oblysynan kelgen búldirshinderge 3 000 dollar tabys etildi. 
Túrkistan oblysy komandasynyń sapyndaǵy Qaraqat Qoılybaeva eń mańyzdy oıynshy atalymynda jeńiske jetti. Úzdik kapıtan aqtóbelik Sergeı Kvak atansa, Jambyl oblysynan kelgen búldirshinder eń uıymshyl komanda boldy.
«Biz aldymen synaq ótkizip, balalardy toptarǵa bólemiz. Erejelerdi byltyrǵydan azdap ózgerttik. Qalaı degenmen de, bir jyldaı tennıspen aınalysqan bala tennıske endi ǵana kelgen balaǵa qaraǵanda áldeqaıda jaqsy daǵdylarǵa ıe bolady. Sondyqtan da, jańadan kelgen balalardyń barlyǵy aqyly toptarǵa túsedi. Qatysý aqysy da asa qymbat emes, aıyna - 13 myń teńge. Bir-eki jyl jattyǵyp, kózge túsken balalardy tegin jattyqtyrylatyn toptarǵa jiberemiz», - deıdi Qazaqstan Tennıs federatsııasynyń atqarýshy dırektory ıÝrıı Polskıı.
Ary qaraı tennısshi balalar ózderin kórsetip, týrnırlerde jeńiske jetýi tıis. Ondaı týrnırler jetkilikti. Tennıs federatsııasy tamyzdyń ózinde Almaty, Astana, Shymkent jáne Kókshetaý qalalarynda 10 balalar týrnırin ótkizedi. Erekshe daryndy balalar úshin bonýstar beriledi. Orta mektepti bitirgen soń AQSh joǵary oqý oryndarynyń birine tegin oqýǵa alynady. Oqyp júrgen jyldary sol ýnıversıtettiń namysyn qorǵaıdy. 22 jastaǵy tennısshi Anna Danılına da osy shema boıynsha oqyp shyqty. Ol jýyrda ǵana Astanada ótken halyqaralyq «Qazaqstan Prezıdenti kýbogyna» qatysyp, el qorjynyna 6-shy tıtýldy saldy. 
6 kúnnen keıin Indonezııada jazǵy Azııa oıyndary bastalady. Onda 8 tennısshi Qazaqstan namysyn qorǵaıdy. Erler arasynda - Aleksandr Býblık, Denıs Evseev, Tımýr Habıbýlın jáne Aleksandr Nedovesov kúsh synassa, áıelder týrnırinde - Gózal Aınıtdınova, Anna Danılına, Jibek Qulambaeva jáne Darıa Detkovskaıa synǵa túsedi. Olardyń ishinde ótken aptada Prezıdent kýbogynda synǵa túsken sportshylar keler jyly bedeldi halyqaralyq dodalarǵa qatysatynyn jaqsy túsinedi.
