Kishkentaı qyzdy pedofılden qutqarǵan jigit kóshbasshy atandy
TALDYQORǴAN. QazAqparat - Búgin Taldyqorǵandaǵy «Jastar» Sport saraıynda Almaty oblysy ákiminiń «Kóshbasshy - 2017» jastar syılyǵy saltanatty túrde tabystaldy, dep habarlaıdy QazAqparat tilshisi.
Bul mərtebeli ataq jyl boıy jastar saıasatyn belsendi túrde júrgizip, belgili jetistikterge jete bilgen, túrli salada ózge jastarǵa úlgi bolarlyq nətıjeler kórsetken 29 jasqa deıingi oblys jastaryna beriledi. Bıyl 17 atalym boıynsha úzdikter anyqtaldy. «Jas batyr» nomınatsııasy Eńbekshiqazaq aýdanyndaǵy D. Qonaev atyndaǵy orta mektep túlegi Tımýrbek Jamoladdınovke buıyrdy.
Esterińizge sala keteıik, 14 sáýir kúni keshkisin Eńbekshiqazaq aýdanyna qarasty Túrgen aýylynda jantúrshigerlik jaǵdaı oryn ala jazdaǵan bolatyn. Abyroı bolǵanda, 11-synyp oqýshysy Tımýrbek Jamoladdınov 8 jasar qyzdy zorlyqtan qutqaryp qalǵan edi.
Sondaı-aq, óz salasynyń kóshin bastap, kóshbasshy atanǵandar qatarynda Jetisý telearnasynyń telejúrgizýshisi Almat Hamıtov ta bar. Ol «Úzdik jas jýrnalıst» nomınatsııasyn ıelendi. Al «Úzdik jas kásipker» - Mansur Qurmanǵalıev, «Úzdik jas aýyl sharýashylyǵynyń mamany» - «Madııar» sharýa qojalyǵynyń jetekshisi Madııar Áýelbaev, «Úzdik jas ǵalym» - S.Demırel atyndaǵy ýnıversıtettiń aǵa oqytýshysy Ermek Toqtarov, «Úzdik jas ustaz» - Úsharal qazaq gımnazııasy dırektorynyń tárbıe isi jónindegi orynbasary Erjan Omarhanov atandy.
Jeńimpazdarǵa estelik syılyqtar men 250 myń teńgeniń aqshalaı sertıfıkattary tabystaldy. Shara sońy elimizdiń jas estrada juldyzdarynyń oryndaýyndaǵy kontserttik baǵdarlamaǵa ulasty.
