Kishkentaı kúnimnen polıtseı bolsam dep armandadym – Zınekesh Sadyqov
ORAL. QazAqparat – Polıtsııanyń bedeli ár qyzmetkerdiń bilim-biligi, abyroı-jaýapkershiligine baılanysty. Osy oraıda QazAqparat tilshisi Tasqala aýdandyq polıtsııa bóliminiń qyzmetkeri, polıtsııa starshınasy Zınekesh Sadyqovpen suhbattasqan edi.
- Zınekesh Bolatuly, qazir orda buzar otyz jastasyń. Ózińdeı jas kadrlar qaı salaǵa da kerek. Polıtsııa qataryna qyzmetke qalaı keldiń?
- Osydan otyz jyl buryn Tasqala aýylynda ómir esigin ashtym. Ákem Bolat Sadyqov balalar-jasóspirimder sport mektebin basqardy, qazir jattyqtyrýshy, anam Dına zeınetker. Keńes Odaǵynyń Batyry Sadyq Jaqsyǵulov atyndaǵy orta mektepte bilim alyp, 9-synyptan keıin Oraldaǵy «KazIITÝ» ǵylymı-bilim kesheniniń kolledjine baǵdarlamashy-tehnık mamandyǵy boıynsha oqýǵa tústim. Degenmen bala kúnnen bergi armanym polıtsııa qatarynda qyzmet etý edi. 2011 jyly áskerı boryshymdy ótep kelgennen keıin bir jyldan soń mamandandyrylǵan kúzet qyzmeti basqarmasynyń kúzet polıtsııasynda qyzmet atqardym. 2017 jyly Tasqala aýdandyq ishki ister bólimine aýystym. Qazir 2-shi arnaıy toptyń kishi ınspektorymyn, «KazIITÝ»-da zańger mamandyǵyn da meńgerip jatyrmyn.
- Ómirdegi, eńbek jolyndaǵy úlgi alar adamdaryń kimder, tálimger, ustaz retinde kimdi aıtar ediń?
- Ómir jolynda kezdesken jaqsy adamdar az emes. Ushqan uıańnan keıin óz ujymyńda baǵyt siltep, jónin aıtar jandar bolǵanǵa ne jetsin. Men sondaı adamdar retinde Rýslan Muhamedrahımov pen Ǵadiljan Jumabaevty aıtar edim. Іshki ister organdarynda jemisti qyzmet etken Rýslan Rahymjanuly qazir zeınetker. Al polıtsııa maıory Ǵadiljan Baızollauly áli de sapta. Aǵa býynnyń aqyl-keńesin ala bilip, keıingige jalǵastyrsaq, urpaqtar sabaqtastyǵy osy dep oılaımyn.
- Elimizde koronavırýs indetine tosqaýyl qoıý maqsatynda blokposttar ornatylǵany belgili. Óziń de sonda qyzmet etken ekensiń, qalaı, qıyn boldy ma?
- Asa qıyn boldy dep aıta almaımyn. Tasqala aýdany ákimdigi, polıtsııa bólimi tarapynan barlyq jaǵdaı jasaldy. Biz blokpostta tártiptiń saqtalýyn qadaǵaladyq. Bir este qalatyn jaıt, blokpostta júrgende, ulym dúnıege kelip, qýanyshqa keneldik. Qazir tuńǵyshym 2 aıǵa toldy, aman-esen ósip keledi.
- Ul demekshi, jaryń ózińdi únemi qoldap otyratyn shyǵar?
- Iá, adam alańsyz eńbek etýi úshin tyly myqty bolýy kerek. Bir jyl buryn úılenip, otaý kóterdim. Jarym Ásel mektepte ınformatıka pániniń muǵalimi, árdaıym qoldaý kórsetip, otbasymdaǵy barlyq jaǵdaıymdy jasap otyrady.
- Polıtsııanyń el ishindegi bedelin kóterý baǵytynda ne isteý kerek dep oılaısyń?
- Meniń oıymsha, qarapaıym halyq pen polıtsııa qyzmetkeri arasynda ózara túsinistik pen adamı qarym-qatynas ornaýy kerek. Polıtsııa qyzmetkerlerine óz isine adaldyq, jaýapkershilik jáne shynaıylyq tán bolýy kerek dep esepteımin. «Ózińe sen, ózińdi alyp shyǵar, Eńbegiń men aqylyń eki jaqtap», dep uly Abaı aıtpaqshy, ózińe senip, adal qyzmet etseń, abyroı da keledi dep oılaımyn.
Eske sala keteıik, budan buryn polıtsııa kapıtany Abzal Úmbetqalıevtiń ulynyń esimin er bolsa eken dep Sardar qoıǵanyn jazǵan bolatynbyz.
