Kishkentaı kórermender kózaıymy «balapan»-ǵa 8 jyl
ASTANA. QazAqparat - Segiz jyl boıy elimizdiń kishkentaı kórermenderiniń kóz qýanyshyna aınalǵan «balapan» telearnasy segizinshi týǵan kúnin atap ótti, dep habarlaıdy QazAqparat tilshisi.
Elimizdegi balalarǵa arnalǵan tuńǵysh jáne jalǵyz arna óz jumysyn 2010 jyldyń 27 qyrkúıeginde bastady. Sol ýaqyttan beri oqý-tanymdyq, sport, oıyn-saýyqtyq, anımatsııalyq jáne ıntellektýaldyq telejobalardy jaryqqa shyǵaryp, ár balanyń senimdi serigine, rýhanı jetekshisine aınaldy.
Telearna 7 jyl ishinde 25 avtorlyq anımatsııalyq joba túsirse, bıyl bir jyldyń ózinde 10 tól týyndysymen búldirshinderdi qýantýda.
«balapan» elimizdegi balalarǵa arnalǵan jalǵyz telearna bolǵandyqtan, baǵdarlama kórsetýshi ǵana emes, tárbıe quraly dep aıtýǵa bolady. Telearnadaǵy jańashyldyqtarǵa kelsek, buryn jylda bir maýsym daıyndasaq, bıyl kóktem, jaz, kúzgi maýsymdar uıymdastyryldy jáne ár maýsym jańa jobalarmen ashyldy. Ondaǵy maqsatymyz - jyl boıy balalardyń kúntizbesine saı jumys isteý, soǵan oraı efırdi jańa kontenttermen júıeli túrde tolyqtyryp otyrý. Osy aralyqta 50 jańa joba kórermen nazaryna usynyldy», - deıdi «balapan» telearnasynyń bas prodıýseri Sandýǵash Baımahanqyzy.
Bas prodıýserdiń aıtýynsha, «balapan» telearnasynyń negizgi aýdıtorııasy 12 jasqa deıin bolǵanymen, zertteý nátıjesi búkil otbasy tamashalaıtynyn kórsetti.
Telearnanyń týǵan kún keshi eki bólimnen turdy, birinshi bólimde balalarmen oıyn-saýyq uıymdastyrylyp, balalarǵa syılyqtar taratyldy, ekinshi bólim elimizdiń túkpir-túkpirinen arnaıy shaqyrylǵan ónerpazdardyń merekelik kontsertine jalǵasty.
