Kishkentaı Aılınniń Túrkııadan shyǵýyna shekteý nege qoıyldy
ASTANA. QazAqparat - Keshe Ystambul soty búldirshin Aılın Mozgovaıanyń Túrkııadan ketýine qoıylǵan shekteýdi alyp tastady. Búldirshin nebári 1 jas 10 aılyq, dep habarlaıdy QazAqparat.
«Keshe Ystambuldyń otbasy isteri jónindegi soty Aılın Mozgovaıanyń elden shyǵýyna qoıylǵan shekteýdi alý jáne talap etýshiniń suraǵan DNK-testi nátıjelerine qaramastan balanyń barlyq zańdy quqyqtaryn onyń anasyna berý týraly qaýly shyǵardy», - dedi Úkimet otyrysy aıasynda BAQ ókilderine suhbat bergen QR SІM baspasóz qyzmetiniń jetekshisi Ánýar Jaınaqov.
Onyń aıtýynsha, 1 aqpan kúni Qazaqstan azamatshasy Vıktorııa Mozgovaıa Ystambuldaǵy elimizdiń bas konkýldyǵyna júginip, turyp jatqan úıde ózine jáne qyzyna qaýip tónip turǵanyn aıtyp, kómek berýlerin ótingen. Sonymen qatar ol Qazaqstanǵa oralýǵa járdemdesýdi suraǵan.
«Sol kúni dıplomattarymyz ony turyp jatqan úıinen alyp ketip, áýejaıǵa aparady. Áýejaıda Túrkııa azamatynyń talabymen jergilikti sot qyzyna elden ketýge ýaqytsha shekteý qoıǵany anyqtalady. Osydan keıin dıplomattarymyz ony qyzymen qonaq úıge ornalastyryp, únemi baılanysyp otyrý úshin smartfon qaldyrady. Sál keıinirek olar Ystambuldyń otbasy isteri jónindegi sotyna azamatshamyzdyń elden ketýine qoıylǵan ýaqytsha shekteý máselesin jedeldetilgen rejimmen qaraý týraly ótinish jasady», - dep túsindirdi ol.
Onyń atap ótýinshe, bul iske Qazaqstannyń Ankaradaǵy Elshiligi de aralasyp, másele QR SІM basshylyǵynyń jáne Túrkııadaǵy Elshisiniń baqylaýynda bolǵan.
