Kıshınevte Qazaqstan men Moldova bıznesin baılanystyratyn jańa alań ashyldy
ASTANA. KAZINFORM — Moldova astanasynda Moldova-Qazaqstan Іskerlik Keńesi keńsesiniń resmı ashylý rásimi ótti. Bul týraly SІM baspasóz qyzmeti málim etti.
Saltanatty is-sharaǵa Moldova Respýblıkasynyń Aýyl sharýashylyǵy jáne tamaq ónerkásibi mınıstri Lıýdmıla Katlabýga (ekijaqty úkimetaralyq komıssııanyń teń tóraǵasy), beıindi mınıstrlikter men vedomstvolardyń, jetekshi iskerlik qaýymdastyqtardyń ókilderi, Parlament depýtattary, sondaı-aq qazaqstandyq jáne moldovalyq kompanııalardyń basshylary qatysty.
— Qazaqstan Respýblıkasynyń Moldova Respýblıkasyndaǵy Elshisi Almat Aıdarbekov bul oqıǵanyń mańyzdylyǵyn atap ótip, keńseniń ashylýy ekonomıkalyq ózara is-qımyldy nyǵaıtý, birlesken ınvestıtsııalyq jobalardy ilgeriletý jáne kásipkerler arasyndaǵy baılanystardy keńeıtý úshin qosymsha ınstıtýtsıonaldyq alań bolatynyn jetkizdi. Sonymen birge, Elshi Keńes júıeli yntymaqtastyqty ornatýǵa jáne iskerlik bastamalardy qoldaýdyń tıimdi tetikterin jasaýǵa múmkindik beretinine senim bildirdi, — delingen mınıstrlik habarlamasynda.
MR Aýyl sharýashylyǵy jáne tamaq ónerkásibi mınıstri L.Katlabýga qatysýshylardy quttyqtap, jańa platformanyń agrarlyq sektor úshin strategııalyq mańyzdylyǵyna nazar aýdardy. Ol Qazaqstandy Moldova úshin perspektıvaly ári aýqymdy naryq dep atap, ózara taýar jetkizýdi arttyrý, agroónerkásiptik keshen salasyndaǵy ozyq tehnologııalarmen almasý jáne birlesken ınvestıtsııalyq jobalardy iske asyrý úshin zor áleýet bar ekenin atap ótti. Mınıstr bul Keńestiń eki eldiń bıznesi úshin senimdi kópir bolatynyna senim bildirdi.
— Moldova-Qazaqstan Іskerlik Keńesiniń tóraǵasy Tuńǵat Ábilqasymov jańa qurylymnyń praktıkalyq mindetterin aıqyndady. Ol keńseniń basty maqsaty — yntymaqtastyq áleýetin naqty kelisimsharttar jazyqtyǵyna kóshirý ekenin málimdedi. Sondaı-aq, ol Keńestiń kedergilerdi azaıtý jáne birlesken kásiporyndardy iske qosýdy jedeldetý úshin barynsha aqparattyq jáne uıymdastyrýshylyq qoldaý kórsetýge daıyn ekenin aıtty, — dep habarlady SІM baspasóz qyzmeti.
Ashylý rásimi aıasynda qatysýshylarǵa Qazaqstannyń ınvestıtsııalyq jáne eksporttyq áleýeti egjeı-tegjeıli tanystyryldy. Іskerlik toptardyń ókilderi yntymaqtastyq perspektıvalaryn talqylady, al is-shara birqatar ekijaqty memorandýmdarǵa qol qoıýmen aıaqtaldy.
Aıta keteıik, Qazaqstan men Moldova konsýldyq saladaǵy yntymaqtastyqty keńeıtedi.
