Kishi Taldykóldi saqtap qalýǵa bolady - sarapshy

NUR-SULTAN. QazAqparat – Elorda aýmaǵyndaǵy Kishi Taldykóldi áli de saqtap qalýǵa bolady. Bul týraly Qazaqstan bıoalýantúrlilikti saqtaý qaýymdastyǵynyń ǵylymı qyzmetkeri Rýslan Orazalıev málim etti, dep habarlaıdy QazAqparat tilshisi.

«Kishi Taldykóldi saqtap qalý múmkindigi áli de bar. Bul turǵyda Ekologııa, geologııa jáne tabıǵı resýrstar mınıstrligi ókiletti organ retinde óziniń naqty ustanymyn tanytýyn talap etemiz. Vedomstvo ol jerdegi qurylysty toqtatyp, ekologııaǵa keltirilgen zalaldy baǵalaýy tıis», - dedi R.Orazalıev atalǵan kóldiń problemalaryn talqylaýǵa arnalǵan dóńgelek ústel otyrysynda.

Sonymen qatar ol Kishi Taldykól aýmaǵynda taralǵan ósimdikter, mekendeıtin qus máselesine toqtaldy.

«Bul aýmaqta ósimdiktiń 98 túrin anyqtadyq. Jándikterdiń 300-den astam túri, balyqtyń eki túri, qosmekendiler men baýyrymen jorǵalaýshylardyń úsh túri, sondaı-aq qustardyń 172 túri tirkeldi», - dedi sarapshy.

Onyń sózine qaraǵanda, Taldykólde Qyzyl kitapqa engen qustar da bar. Munymen qosa, kóldiń aýmaǵynda sútqorektiler sanatyndaǵy ańdardyń 10 túri anyqtaldy. Solardyń arasynda bireýi joıylyp bara jatyr eken.

Budan buryn habarlanǵandaı, elimizdiń belgili sáýletshileri Kishi Taldykól mańyndaǵy qurylysqa qatysty pikir bildirdi. Olardyń paıymynsha, qazir onda qurylys júrip jatqan bolsa, onda sheshimdi taǵy da saraptap, qalǵan jerlerin saqtap qalǵan jón.