Kishi Taldykól týraly sot isi 17 aqpanǵa qaldyryldy
NUR-SULTAN. QazAqparat – Nur-Sultan qalasynyń Arnaıy mamandandyrylǵan aýdanaralyq ákimshilik soty Kishi Taldykól týraly kezekti sot otyrysyn ótkizdi, dep habarlaıdy QazAqparat.
Sotqa «Aqiqat» korporatıvtik zańgerler koalıtsııasy talap-aryz jazǵan bolatyn. Jaýapkerler retinde Nur-Sultan qalasy ákiminiń apparaty men «Astana - Tehnopolıs» arnaıy ekonomıkalyq aımaǵynyń basqarýshy kompanııasy shaqyrylǵan. 27 qańtarda sot Kishi Taldykól týraly sot isin qaıta qozǵaǵan edi.
Eske sala ketsek, «Aqiqat» korporatıvtik zańgerler koalıtsııasy elorda ákimdiginiń Kishi Taldykól mańynda sý qorǵaý aımaǵy men beldeýin ornatý boıynsha shara qabyldamaýyna baılanysty sotqa júgingen bolatyn. Sonyń saldarynan SAT-NS JShS jáne onymen baılanysty qurylys kompanııalary Kishi Taldykól kólderi toby ornalasqan aýmaqta qurylys júrgizý týraly «Astana-Tehnopolıs» AEA-men shart jasasý múmkindigine ıe bolǵan.
Sot otyrysynda sýdıa Janar Dúısenova barlyq tarapqa 15 aqpanǵa deıin birqatar qosymsha málimetter berýdi tapsyrdy.
«Sot isin tyńdaýdy 17 aqpanǵa, saǵat 11:30-ǵa qaldyramyz», - dedi sýdıa J. Dúısenova.
Aldyńǵy otyrysta sýdıa «Astana-Tehnopolıs» AEA Basqarýshy kompanııasy men SAT-NS JShS arasynda jasalǵan barlyq 16 qosalqy jaldaý sharttaryn, jer ýchaskelerin segmentteý týraly, osy ýchaskelerdi ıgerý kezeńderi týraly málimetterdi suraǵan edi.
Endi sýdıa QR ekologııa, geologııa jáne tabıǵı resýrstar mınıstrligi Sý resýrstary komıtetiniń ókili Marat Imanalıevke sý qorǵaý aımaǵy men sý qorǵaý beldeýlerin belgileý qajettigi men tártibine qatysty jazbasha qorytyndy berýdi tapsyrdy.
