Kishi Djordj Býshqa qoqan-loqy jasaǵan qarýly adam ustaldy
ASTANA. QazAqparat - AQSh quqyq qorǵaý organdary eldiń burynǵy prezıdenti kishi Djordj Býshqa qoqan-loqy jasaǵan qarýly adamdy tutqyndady, dep habarlady Reuters.
Agenttik aqparatyna qaraǵanda, 44 jastaǵy Amerıka azamaty Bendjamın Smıtti keshe Nıý-Iorkte memlekettiń burynǵy jáne qazirgi birinshi basshylary men olardyń otbasylaryn qorǵaıtyn AQSh Qupııa qyzmetiniń qyzmetkerleri ustaǵan. Kóliginde otyrǵan kezinde tutqynǵa túsken odan oqtaýly myltyq, qanjar jáne 1 kanıstr benzın tabylǵan.
Qaýipsizdik qyzmeti qyzmetkerleriniń aıtýynsha, Smıtti onyń uıaly telefony arqyly qolǵa túsirgen.
Osy beısenbi kúni onyń anasy polıtsııaǵa ulynan hat alǵandyǵyn habarlaǵan bolatyn. Onda ol kishi Djord Býsh pen Pentagonǵa jumys isteýge ketetindigin aıtqan. Sondaı-aq ol óz hatynda «Men aıdahardy óltirýim kerek. Sonda Barbara Býsh meniki bolady», -dep jazǵan.
Nıý-Iorkte ótken aldyn ala tyńdaý barysynda prokýror hatta jazylǵan adamnyń AQSh-tyń burynǵy prezıdentiniń 32 jastaǵy qyzy Barbara Pırs Býsh bolýy múmkin ekendigin basa aıtyp otyr. Smıttiń aldaǵy taǵdyryn alqa bıler soty sheshetin bolady.
