Kishi Chaveske Golovkınmen jekpe-jek ótkizý úshin 7 mıllıon dollar usynǵan
ASTANA. QazAqparat - Orta salmaqtaǵy burynǵy chempıon Hýlıo Sezar kishi Chaveske (48-1-1, 32 KO) byltyr WBA (Super), IBO jáne WBC Interim tujyrymdarynyń orta salmaqtaǵy chempıony qazaqstandyq boksshy Gennadıı Golovkınmen (32-0, 29 KO) judyryqtasý jóninde usynys tastaldy. Degenmen meksıkalyq boksshy odan bas tartty, dep habarlaıdy Tofight.ru.
Mundaı sharttardy Hýlıo Sezar kishi Chaveske Top Rank promoýterlik kompanııasy qoıǵan. Degenmen kóktemde Golovkınmen kezdesý ótkizesiń degen talap kelgende olardyń arasynda daý shyǵyp, bul jekpe-jek bolmaı qaldy. Atap aıtqanda, boksshyǵa mynadaı talap qoıylǵan: Golovkınmen kezdesý ótkizip, 7 mıllıon alasyń jáne Top Rank kompanııasynda qalasyń nemese Golovkınmen kezdesýden soń eki mıllıon dollar alyp, Top Rank kompanııasynan kelisimshart úzesiń. Alaıda boksshyǵa bul unamasa kerek. Kóp oılanbastan ol El Heımonmen kelisim jasasyp, Top Rank-tan ketetindigin málimdedi.
Degenmen kompanııa basshysy Bob Arým boksshydan jaıdan-jaı aıyrylǵysy kelgen joq. Kompanııa Hýlıo Sezar kishi Chaves olardyń qanatynyń astynda taǵy bir kezdesý ótkizýi mindetti dep talap etti. Boksshy bolsa, eshkimge de mindetti emestigin aıtýmen boldy jáne 18 sáýirge Andjeı Fonvaramen jekpe-jek ótkizý jóninde kelisimge qol qoıyp úlgergen. Buny bilgen Bob Arým boksshyny sotqa beretindigin habarlady. Biraq kóp uzamaı taraptar máseleni beıbit jolmen sheshti.
«Daý aıaqtaldy, eki tarap qanaǵattandyryldy, sebebi barlyǵy óte jaqsy aıaqtaldy», - dep atap ótti B.Arým.
Endi meksıkalyq boksshynyń El Heımonnyń promoýterlik kompanııasyndaǵy alǵashqy jekpe-jegi 18 sáýirde Andjeı Fonfaraǵa qarsy ótedi.
Eske sala keteıik, kishi Chaves sońǵy kezdesýin 2014 jyly naýryzda Braıan Verýge qarsy ótkizip, jeńiske jetken bolatyn.
