Kishi Aralǵa jınalǵan sý qumǵa ketýi múmkin – Senat tóraǵasy
Spıker osydan 5 jyl buryn bógettiń bir bóligin sý shaıyp ketkenin, sonyń saldarynan búlingen ýchaskeniń kólemi 200 metrge jetkenin aıtty.
«Osydan eki apta buryn bizdiń depýtattar Aral qalasynda ózbekstandyq senatorlarmen kezdesip, Araldy qalpyna keltirý máselesin jan-jaqty talqylady. Sonda depýtattar Kókaral bógetine arnaıy baryp, onyń jaǵdaıyn óz kózderimen kórdi. Jalpy, Kókaral – Kishi araldaǵy sýdy Úlken Aralǵa jibermeı saqtap turýǵa arnalǵan strategııalyq mańyzy bar nysan. Eger osy bóget shaıylyp ketse, osynsha jyl Kishi Aralǵa jınaǵan sýymyz qumǵa sińip ketedi. Oǵan qanshama qarjy bólindi, Dúnıejúzilik banktiń kómegin de aldyq, Úkimet te qarjy bóldi. Sol sýǵa tutas óńirdiń halqy qarap otyr. Eger sý deńgeıi tómendep ketse, úlken áleýmettik, ekonomıkalyq, ekologııalyq saldary bolatyny belgili. Ashyǵyn aıtsaq, úlken apat bolady. Biraq ony jóndeý jumystaryna qatysty nemquraılyq bizdi alańdatyp otyr. Sondyqtan bógetti kúrdeli jóndeý jumystaryn dereý bastaǵan jón», – dedi Máýlen Áshimbaev.
Senat tóraǵasynyń aıtýynsha, qazir Qyzylorda oblysynyń ákimdigi bógetti jóndeýge qatysty qujattardy ázirlegen. Soǵan sáıkes atalǵan jumysqa jalpy 5 mlrd teńgege jýyq qarajat kerek. Al jóndeý jumystaryn bıyl bastaý úshin 500 mln teńge qarajat qajet.
Máýlen Áshimbaev Qarjy mınıstrligine jáne Ekologııa, geologııa jáne tabıǵı resýrstar mınıstrligine osy máselege nazar aýdaryp, bıylǵa tıisti qarajatty bólý múmkindigin qarastyrý qajet ekeni jetkizdi. Al, qarajattyń negizgi bóligin kúzde 2023 jylǵy bıýdjetke engizýdi usyndy.
Aıta keteıik, búgin Senat otyrysynda depýtattar «Qazaqstan Respýblıkasynyń Ulttyq qorynan 2022–2024 jyldarǵa arnalǵan kepildendirilgen transfert týraly» Zańyna ózgeris engizý týraly» jáne «2022–2024 jyldarǵa arnalǵan respýblıkalyq bıýdjet týraly» Zańyna ózgerister men tolyqtyrýlar engizý týraly» Zańdardy qarap, qabyldady.
