Kishi Aral teńizinen 300 kelige jýyq balyq aýlaǵan brakonerler qolǵa tústi
QYZYLORDA. QazAqparat -Ekologııalyq qylmystar men quqyq buzýshylyqtardy eskertý, anyqtaý jáne kináli tulǵalardy jaýapkershilikke tartý maqsatynda Aral aýdandyq ishki ister bólimi qyzmetkerleri men Orman sharýashylyǵy jáne janýarlar dúnıesi aýmaqtyq ınspektsııasy mamandarynyń birlesip júrgizgen reıdtik sholý jumystary barysynda 287,4 keli balyq aýlaǵan 2 azamat ustaldy.
Bul týraly QazAqparat tilshisi oblystyq ІІD silteme jasap habarlady.
Atap aıtqanda, 15 qyrkúıekte Aral aýdany, Kishi Aral teńiziniń kún shyǵys jaq betindegi sý jaǵalaýynda ruqsatsyz balyq aýlap júrgen 41 jáne 46 jastaǵy 2 azamat ustalyp, qaıyqtarynan jalpy salmaǵy 118 keli kókserke, 24,5 keli sazan, 2,5 keli jaıyn, 37 keli taban, 103,5 keli torta balyǵy tabyldy. Tekserý barysynda ustalǵan azamattar 900 metrlik jip aýmen balyq aýlaǵandary belgili bolyp, anyqtalǵan aýlaý quraldary tárkilendi.
Qazirgi tańda atalǵan derek Qazaqstan Respýblıkasy Qylmystyq kodeksiniń 335-baby 3-bóligi 4-tarmaǵymen (Balyq resýrstaryn, basqa da sý janýarlaryn nemese ósimdikterin zańsyz alý) Sotqa deıingi tergep-tekserýdiń biryńǵaı tizilimine tirkelip, tergep-tekserý jumystary júrgizilýde.
Eger de ustalǵandardyń qylmystyq áreketi dáleldense, belgili bir laýazymdardy atqarý nemese belgili bir qyzmetpen aınalysý quqyǵynan úsh jylǵa deıingi merzimge aıyra otyryp, eki myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne eki jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady.
