Kishi Almaty ózeniniń joǵary bóligi memleket menshigine qaıtarylýy múmkin
ALMATY. QazAqparat – Búgin Medeý aýdany turǵyndarymen kezdesken Almaty ákimi Erbolat Dosaev megapolıstegi parkter men demalys oryndarynyń qurylysy týraly aıtty, dep habarlaıdy QazAqparat tilshisi.
Megapolıs basshysynyń sózinshe, qazir Kishi Almaty ózeniniń terrenkýrdaǵy sý aıdynynyń joǵarǵy bóligin memleket menshigine qaıtarý jumystary júrgizilip jatyr.
«Qoǵamdyq keńistikterdi damytý aıasynda Kishi Almaty ózeniniń terrenkýrdaǵy sý aıdynynyń joǵarǵy bóligin memleket menshigine qaıtarý protsedýrasy júrgizilýde. Balansqa qabyldanǵannan keıin bógetti nyǵaıtý jáne almatylyqtardyń súıikti oryndarynyń biriniń aýmaǵyn abattandyrý boıynsha jeke joba ázirlenedi. Jobalaý-smetalyq qujattama 2023 jyldyń III toqsanynda aıaqtalady»,- dedi Erbolat Dosaev.
Sonymen qatar ol jaıaý júretin belgili joldarǵa erekshe nazar aýdarylǵanyn atap ótti.
«Búgingi kúni «Kóktóbe» saıabaǵynda qala turǵyndary men qonaqtary joldyń boıymen júrýge májbúr. Bul – adamdarǵa qolaısyz jáne qaýipti. Turǵyndardyń ótinishin eskere otyryp, kelesi jyldyń III toqsanynda jaıaý júretin adamdarǵa «densaýlyq joly» salynady»,- dedi qala ákimi.
E.Dosaevtiń aıtýynsha, bıyl 2 skverdi jańartý jumystary aıaqtalady. Onyń ishinde Oqýshylar saraıy men Qazaqstan Respýblıkasy Memlekettik mýzeıiniń janyndaǵy skverler bar. Fontandar jańartylyp, jaryq pen shaǵyn sáýlettik nysandar ornatyldy.
Budan bólek, kelesi jyly Memlekettik mýzeıdiń ońtústiginde «Jýrnalıster» alańyn jáne ondaǵy sýarý júıesin jańartý jumystaryn bastaý josparda.
«Maýsymda ótken kezdesý barysynda Alataý shaǵyn aýdanynda skeıt-park jasaý máselesi kóterildi. Jumystar Ibragımov kóshesindegi skverdiń qurylysy kezinde, ıaǵnı 2023 jyldyń II toqsanynda júrgiziledi»,- dedi Almaty basshysy.
