Qys mezgili bastalǵaly beri Astanadan eki mln tekshe metrden astam qar shyǵaryldy

ASTANA. KAZINFORM — Elordada kommýnaldyq qyzmetter qys mezgili bastalǵaly beri táýlik boıǵy kúsheıtilgen jumys rejımine kóshken. Boran men qolaısyz aýa raıyna qaramastan, qar kúreý jumysy toqtaýsyz júrgizilip jatyr, dep habarlaıdy Astana qalasy ákimdiginiń resmı saıty.

Atap aıtqanda, ótken túnde qaladan 3 146 aýyr júk kóliginiń reısimen 42 myńnan astam tekshe metr qar shyǵaryldy.

9 qańtar kúni tańerteńgi aýysymda qar tazalaý jumystaryna 3 myńnan astam jol jumysshysy jáne 1 500-den asa arnaıy tehnıka jumyldyryldy.

Jalpy qys bastalǵaly beri qaladan qar polıgondaryna 155 982 reıspen eki mıllıon tekshe metrden astam qar shyǵaryldy.

Eń aldymen negizgi kóshe magıstraldary men qoǵamdyq kólik baǵyttary tazartylýda. Odan keıin qozǵalys qarqyny ortasha aýmaqtarda – aýlalarda, alańdarda, trotýarlar men aıaldamalarda qar tazalaý jumysy júrgiziledi.

Qala turǵyndarynyń qaýipsiz júrýin qamtamasyz etý maqsatynda joldarǵa, trotýarlar men kóshelerge tehnıkalyq tuz sebilip jatyr. Bul jumys ta táýlik boıy atqarylýda.

Sonymen qatar, aýla aýmaqtarynyń tazalyǵyn qamtamasyz etý PIK pen MIB-tiń mindeti ekeni atap ótiledi. Atalǵan uıymdar turǵyndardyń qaýipsizdigi men qolaılylyǵy úshin aýlalardy qar men muzdan ýaqytyly tazalaýy tıis.

Astana qalasynyń ákimdigi qala turǵyndary men qonaqtaryn qaýipsizdik erejelerin saqtaýǵa, joldar men trotýarlarda barynsha saq júrýge, sondaı-aq aýa raıy qolaısyz kúnderi alys saparlarǵa shyqpaýǵa shaqyrady.

Aıta keteıik, Qaraǵandy – Astana tasjolynda polıtsııanyń kúshimen myńǵa jýyq kólik qaýipsiz jerge shyǵaryldy.