Qys bastalǵaly 1,1 myńnan astam adam qar qursaýynan qutqaryldy

ASTANA. KAZINFORM —  Tótenshe jaǵdaılar mınıstrliginde qysqy kezeńniń ótýi, apattyq-qutqarý jumystarynyń júrgizilýi jáne aldaǵy meteorologııalyq jaǵdaıǵa boljam jóninde baspasóz brıfıngin ótkizdi. 

Vedomstvonyń habarlaýynsha, qysqy kezeńde tótenshe jaǵdaılarǵa jedel áreket etý maqsatynda el boıynsha 44 myńnan astam qutqarýshy jáne 14 myńnan asa tehnıka ázirlengen. Ortalyq memlekettik organdar men jergilikti atqarýshy organdardyń mindetteri aıqyndalǵan.

— 2025 jylǵy 1 qarashadan beri qar qursaýynan 1 137 adam qutqarylyp, evakýatsııalandy, onyń ishinde 129 bala bar. Sondaı-aq 199 tehnıka qardan shyǵaryldy, — dedi TJM Tótenshe jaǵdaılardy joıý departamentiniń basshysy Magomed Ahrıev.

Onyń aıtýynsha, el óńirlerinde 1 681 jylytý pýnkti daıyndaldy. Sonymen birge, 40 trassalyq medıtsınalyq-qutqarý pýnkti de jylytý pýnkti retinde paıdalanylatyn bolady.

TJM Strategııalyq josparlaý jáne jedel basqarý ortalyǵynda respýblıkalyq jedel shtab jumys istep tur, mundaı shtabtar eldiń barlyq 17 óńirinde qurylǵan.

Azamattyq qorǵaý kúshteri men basqarý organdarynyń daıyndyǵyn baǵalaý maqsatynda barlyq óńirde aldyn ala «Qys-2025» komandalyq-shtabtyq oqý-jattyǵýy ótkizilgen.

Óz kezeginde «Qazgıdromet» RMK ókilderi aýqymdy tsıklon el aýmaǵynyń basym bóliginde jalǵasatynyn aıtyp otyr. Osyǵan baılanysty qar, boran jáne jeldiń kúsheıýi kútiledi. Ońtústik pen ońtústik-shyǵysta jańbyr men qar túrindegi jaýyn-shashyn, kóktaıǵaq jáne tuman boljanyp otyr.

Buǵan deıin TJM qazaqstandyqtardy saqtyq sharalaryn ustanýǵa, daýyldy eskertýlerdi baqylaýǵa jáne qolaısyz aýa raıy jaǵdaıynda alys jolǵa shyqpaýǵa shaqyrǵan bolatyn.