«Qys-2025»: qysqy tótenshe jaǵdaılarǵa daıyndyq tekserildi
ASTANA. KAZINFORM — El óńirlerinde qysqy kezeńdegi tótenshe jaǵdaılardyń aldyn alýǵa jáne olardy joıýǵa azamattyq qorǵaý memlekettik júıesiniń aýmaqtyq kishi júıesiniń ázirligin arttyrýǵa baǵyttalǵan «Qys-2025» komandalyq-shtabtyq oqý-jattyǵýlary ótti, dep habarlaıdy TJM baspasóz qyzmeti.
Vedomstvo atap ótkendeı, oqý-jattyǵýdyń negizgi maqsaty — basqarý organdarynyń, azamattyq qorǵaý kúshteri men quraldarynyń ózara is-qımylyn pysyqtaý, yqtımal qysqy TJ-ǵa den qoıýdyń jedeldigi men tıimdiligin arttyrý.
Batys Qazaqstan oblysynda úsh qalalyq lokatsııada jergilikti atqarýshy organdardyń, polıtsııanyń jáne volonterlerdiń qatysýymen qysqy tótenshe jaǵdaılarǵa den qoıý is-qımyldary pysyqtaldy. «Jaıyqjylýqýat» AQ men «Qazaqgaz aimaq» AQ basqarý sıgnaldary jetkizilip, taqyryptyq jattyǵýlar ótkizildi. TJ saldaryn joıý kezindegi jaǵdaıdy baǵalaý jáne sheshim qabyldaý algorıtmi pysyqtaldy. Balyqshynyń joǵalýyn modeldeý boıynsha izdestirý-qutqarý is-sharalary jeke uıymdastyryldy: qyzmettik ıtti qoldana otyryp jaǵalaý syzyǵyn tekserý, jaıaý syzyqtyq izdeý jáne jedel kómek kórsetý sharalary atqaryldy. Óńirde barlyǵy shamamen 600 adam jáne 200 tehnıka jumyldyryldy.
Pavlodar oblysynda oqý-jattyǵý Kenjekól aýylynda ótti. Qysqy kezeńge óńirde 188 jylytý pýnkti daıyndaldy, sonyń ishinde 11-i jol-paıdalaný basqarmalarynyń bazalarynda ornalasqan. Bul pýnktter 20 myńnan astam adamdy qabyldaı alady, sondaı-aq 4300 tósek-orynmen qamtamasyz etilgen. Yqtımal tótenshe jaǵdaılardy joıý úshin quramynda 2788 adam jáne myńnan astam qar tazalaıtyn, ınjenerlik, evakýatsııalyq jáne ótimdiligi joǵary tehnıkalar bar top jasaqtaldy. TJD bólimsheleri ótimdiligi joǵary 90 tehnıkamen jabdyqtalǵan. Daǵdarys jaǵdaılarynda qulaqtandyrý júıeleriniń jumysy jáne jedel qyzmetterdiń ózara is-qımyly tekserildi. Tórt oqý-jattyǵý stsenarııi pysyqtaldy: respýblıkalyq mańyzy bar trassadaǵy jol-kólik oqıǵasynyń saldaryn joıý, boran saldarynan joldardyń jabylýy kezindegi is-qımyldar, jylytý pýnktin ornalastyrý, sondaı-aq energııamen jabdyqtaý nysanyndaǵy avarııalyq-qalpyna keltirý jumystary.
Shymkent qalasynda ótken jyldardyń taldaýyna negizdelgen qysqy tótenshe jaǵdaılarǵa den qoıý boıynsha eki kúndik oqý-jattyǵý ótkizildi. Tynys-tirshilikti qamtamasyz etý nysandaryna, atap aıtqanda sýmen jabdyqtaý, jylý berý jáne energııamen jabdyqtaý júıelerine bólindi. Oqý-jattyǵýlar aıasynda 11 oqý núktesinde praktıkalyq sharalar júrgizildi. Praktıkalyq bólimde Qarataý, Eńbekshi jáne Turan aýdandarynda sý deńgeıiniń shartty kóterilýinen týyndaıtyn sý basýdyń aldyn alý is-sharalary atqaryldy. Mamandar halyqty evakýatsııalaý, arnalardy tazartý, bógenderdi nyǵaıtý jáne ınjenerlik júıelerdiń úzdiksiz jumysyn qamtamasyz etý jumystaryn pysyqtady. Ekinshi kúni shartty avarııalar joıyldy: gaz qubyrynyń jarylýy jáne «3-Energoortalyq» AQ nysanynda órt, A-2 avtojolynda gaz qubyrynyń zaqymdanýy, transformatordyń isten shyǵýy jáne Qarataý aýdanynda elektr men gaz berýiniń ýaqytsha toqtaýy. Jumystarǵa 216 adam jáne 41 birlik tehnıka jumyldyryldy. Barlyq shartty tótenshe jaǵdaılar der kezinde joıylyp, qyzmetter daıyndyq deńgeıin kórsetti.
«Qys-2025» oqý-jattyǵýlary barlyq qyzmetterdiń úılesimdi jumysyn jáne óńirlerdiń qysqy kezeńge daıyndyǵyn kórsetti. Qorytyndylar jasalyp, is-qımyldardyń tıimdiligi men qurylymdardyń ózara árekettestigi taldandy, azamattyq qorǵaý júıesin odan ári jetildirý boıynsha usynymdar ázirlendi.
Budan buryn TJM mamany órttiń negizgi shyǵý sebepterin atady.