Kırsan Ilıýmjınov Dınara Sádýaqasovanyń shahmat akademııasynda boldy
ASTANA. QazAqparat - QR Táýelsizdiginiń 25 jyldyǵyn merekeleý qurmetine Astanada balalar men jasóspirimder arasynda shahmattan týrnır ótti. Astana qalasynyń ákimi Áset Isekeshevtiń qatysýymen ótken sharanyń saltanatty ashylýyna FIDE prezıdenti Kırsan Ilıýmjınov jáne shahmattan 12-shi álem chempıony Anatolıı Karpov qatysty.
Sondaı-aq, Kırsan Ilıýmjınov shahmattan halyqaralyq týrnırlardyń birneshe dúrkin chempıony Dınara Sádýaqasovanyń shahmat akademııasynda boldy, dep habarlaıdy elorda ákimdiginiń saıty.
«Ákimniń shaqyrýymen Astanaǵa halyqaralyq shahmat federatsııasynyń prezıdenti Kırsan Ilıýmjınov pen shahmat ańyzy 12-shi álem chempıony Anatolıı Karpov keldi. Balalar qurmetti qonaqtardy kórip, shabyttanyp, odan ári jetilýge yntalana túsedi dep oılaımyn. Osy saparlary barysynda meniń jaqynda ashqan akademııama kelgenine qýanyshtymyn. Men úshin eń bastysy - myqty shahmatshylardy tárbıelep shyǵarý, osy akademııanyń qabyrǵasynda bolashaq álem chempıondaryn ósirip shyǵaramyz dep senemin», - dedi Dınara Sádýaqasova.
Chempıonnyń aıtýynsha, astanalyqtar shahmat oıynyna úlken qyzyǵýshylyq tanytýda. Sol sebepti Jańa jylǵa qaraı sportshy ǵımaratyn keńeıtýdi kózdep otyr. Bul iste onyń basty kómekshisi ári demeýshisi - anasy Oral Ótesheva.
«Dınara jaqynda alǵashqy qaıyrymdylyq seansyn ótkizip, jınalǵan qarajatty joǵary bilim alǵysy keletin, alaıda múmkindikteri joq erekshe qajettilikteri bar balalarǵa kómek kórsetýge jumsady. Qazir ol óziniń jańa kitabyn baspaǵa daıyndap jatyr, al birinshi kitaby 2014 jyly jaryq kórgen. Bul shahmat oınaǵysy keletin barlyq qazaqstandyqtar úshin kómek bolady dep esepteımin», - dep málim etti shahmatshynyń menedjeri Oral Ótesheva.
