Kırov sý qoımasynyń ótkizý múmkindigi vegetatsııa aralyq kezeńde eki esege artatyn bolady – Nurjan Nurjigitov

ASTANA. KAZINFORM - Bishkektegi Qazaqstan-Qyrǵyzstan Úkimetaralyq keńesi otyrysynyń qorytyndysy boıynsha QR Premer-mınıstri Oljas Bektenov pen Qyrǵyzstan Mınıstrler kabınetiniń Tóraǵasy – Prezıdent Ákimshiliginiń Basshysy Aqylbek Japarovtyń qatysýymen sý resýrstary salasyndaǵy ózara is-qımyl boıynsha ýaǵdalastyqtarǵa qol jetkizildi. Bul týraly QR Úkimetiniń baspasóz qyzmeti málim etti. 

Bıylǵy vegetatsııalyq kezeń qalypty rejımde ótti. Qyrǵyz tarapy ýaǵdalastyqtar sheńberinde Shý jáne Talas ózenderi boıynsha júz paıyz sý berýdi qamtamasyz etti. Nátıjesinde Jambyl oblysynyń sharýalary tolyq kólemde sý aldy.

— Biz Kırov sý qoımasynyń tolý máselesin kóterdik. Búgingi tańda sý kólemi ótken jyldyń deńgeıinen úsh ese kóp. Bizde kóktemgi sý tasqyny kezinde úlken aǵyn bolady, al bul sý kólemi Jambyl oblysyna baǵyttalýy múmkin degen alańdaýshylyq bar. Qyrǵyz tarapy bul úderis turaqty baqylaýda jáne kóktemgi sý tasqyny kezinde sý kólemi qaýipsiz rejımde jiberiletinine sendirdi. Belgilengen kestege sáıkes, vegetatsııa aralyq kezeńde Kırov sý qoımasynan sý jiberýdi eki esege ulǵaıtý jóninde mindetteme aldy. Búgingi tańda biz sekýndyna 10 m3 alamyz, olar qajet bolǵan jaǵdaıda sekýndyna 20 m3 deıin arttyratyn bolady, — dedi Sý resýrstary jáne ırrıgatsııa mınıstri Nurjan Nurjigitov.