Qyrkúıekte ónimniń egistikten sórege deıingi jolyn qadaǵalaıtyn júıe iske qosylady
ASTANA. KAZINFORM — Qyrkúıekte agrarlyq ónimniń egistikten sórege deıingi jolyn qadaǵalaıtyn júıe iske qosylady. Bul týraly Premer-mınıstr Oljas Bektenov Senat depýtatynyń saýalyna joldaǵan jaýapta málim etti.
— Agrarlyq salanyń búkil aqparattyq júıesin biriktiretin «E-AÓK» biryńǵaı platformasy ázirlenip jatyr. Vaktsınatsııa men oryn aýystyrýdy qosa alǵanda, tolyq qadaǵalaýdy qamtamasyz etetin «AJS» janýarlardy esepke alý júıesi jumys isteıdi. Sondaı-aq janýarlardyń ónimdiligi men jaı-kúıin boljaýdyń JI tehnologııalary engizilmek, — deıdi Oljas Bektenov.
Sondaı-aq, ol fıtosanıtarııalyq sertıfıkat berý rásimi de elektrondyq formatqa aýystyrylǵanyn eske salady.
— Bıylǵy qyrkúıekte ónimniń egistikten sórege deıingi jolyn, onyń ishinde ónimdilikti, saqtaýdy jáne logıstıkany qamtıtyn qadaǵalaý júıesin (ÓSJ) iske qosý josparlanǵan, — dep jazady Úkimet basshysy.
Buǵan deıin veterınarııalyq qujaty joq mal ónimin satqandar qylmystyq jaýapkershilikke tartylýy múmkin ekenin jazǵan edik.