Qyrkúıekte qazaqstandyqtarǵa 254 myń bos jumys orny usynyldy
ASTANA. KAZINFORM- 2026 jyldyń toǵyz aıynda jumys berýshiler Enbek.kz elektrondy eńbek bırjasyna 1 mıllıonnan astam bos jumys ornyn jarııalaǵan. Bul 2025 jyldyń osy kezeńimen salystyrǵanda 11,9%-ǵa kóp.
QR Eńbek jáne halyqty áleýmettik qorǵaý mınıstrligi baspasóz qyzmetiniń habarlaýynsha, byltyrǵy toǵyz aıda platformada 978 myń bos jumys orny tirkelgen.
2026 jyldyń qańtar-qyrkúıek aılarynda platformada aı saıyn orta eseppen 120 myńǵa jýyq jumysqa ornalasý múmkindigi usynylǵan.
-Jumys berýshilerdiń belsendiligi ásirese qyrkúıek aıynda artty. Osy aıda 254 myń bos jumys orny jarııalanyp, toǵyz aıdaǵy jalpy kórsetkishtiń 23,2%-yn qurady. Qyrkúıektegi kórsetkish tamyz aıymen salystyrǵanda eki esege jýyq ósti. Bos jumys oryndarynyń sany barlyq salada artqan. Ásirese saýda, qurylys, óńdeý ónerkásibi jáne kólik salalarynda ósim baıqaldy,-delingen habarlamada.
2026 jyldyń toǵyz aıynda jarııalanǵan bos jumys oryndarynyń 26,3%-y bilim berý salasyna tıesili boldy. Odan keıin basqa qyzmet túrleri – 13%, densaýlyq saqtaý jáne halyqqa áleýmettik qyzmet kórsetý – 8,5%, óńdeý ónerkásibi – 7,2% jáne memlekettik basqarý – 6,8% kórsetkishpen tur.
Óńirler boıynsha bos jumys oryndarynyń eń kóp úlesi Astana qalasynda tirkeldi – 8,7%. Almaty qalasynyń úlesi – 8,4%, Qaraǵandy oblysynda – 6,8%, Túrkistan oblysynda – 6,7%, al Pavlodar oblysynda 6,3% boldy.
Qaı mamandyq ıesi qansha jalaqy alatyny týraly myna materıaldan oqyńyzdar.
