Qyrkúıekte kásipkerler temekini qabyldaý men satýda qınaldy
ASTANA. KAZINFORM — Qyrkúıekte Biryńǵaı ulttyq tańbalaý júıesindegi irkilisterge baılanysty kásipkerler temekini qabyldaý men satýda qıyndyqqa tap boldy. Máseleniń sebebin TAÑBA biryńǵaı tańbalaý jáne qadaǵalaý operatory túsindirdi.
Birneshe kún buryn elimizde tańbalanatyn taýarlar tizimi keńeıgen edi. OKQ-daǵy brıfıngte jýrnalıster osy keńeıýdiń týyndaǵan qıyndyqtarǵa áser etip-etpegenin surady.
TAÑBA taýarlardy tańbalaý jáne qadaǵalaý biryńǵaı operatorynyń basqarýshy dırektory Almat Ismaılov júıede jappaı irkilis bolmaǵanyn aıtty.
— 9 jáne 10 qyrkúıekte temeki ónimderi boıynsha qujattardy óńdeý uzaǵyraq ýaqyt aldy. Júıe jumys istep turdy, tek qujattar ádettegiden baıaý óńdeldi. Buǵan tehnıkalyq sebep áser etti. Atap aıtqanda júıeniń derekter qoımasynyń jumys qýaty ýaqytsha tómendedi. Bul tańbalanatyn taýarlar tiziminiń keńeıýine baılanysty emes. Biz tehnıkalyq qoldaý qyzmetin kúsheıtilgen rejımge aýystyrdyq. Osy eki kúnde qoldaý qyzmetine shamamen 43 ótinish kelip tústi. Aıta keteıin, tańbalaý júıesinde temeki buıymdary boıynsha 60 myńnan astam paıdalanýshy tirkelgen, — dedi Almat Ismaılov.
Sondaı-aq ereje boıynsha júıedegi tehnıkalyq irkilis týraly aqparat operatordyń resmı betinde jarııalandy. Paıdalanýshylar erejede qarastyrylǵan qaǵaz qujattarmen jumys isteýdiń ýaqytsha tártibin qoldana aldy. Bul qujattardy júıeniń jumysy qalpyna kelgennen keıin oǵan engizý kerek.
Aıta keteıik, Oralda quny 100 mln teńgege jýyq zańsyz temeki aınalymynyń joly kesildi.
