Qyrkúıekte Jibek Joly arnasynan jańa «111 Juz on bir» serıaly kórsetiledi
ASTANA. KAZINFORM — Jańa televızııalyq maýsymda Jibek Joly telearnasynda «111 Juz on bir» telehıkaıasynyń premerasy bolady.
111 Juz on bir — detektıvtik drama janryndaǵy 40 serııaly fılm. Sıýjet áıelderdi zorlyq-zombylyqtan qorǵaý bólimshesi qyzmetkerleriniń kúndelikti ómirin kórsetedi.
Basty keıipker — ınspektor Aıjan Qambarova súıikti adamynan aıyrylǵannan keıin bar ýaqytyn jumysyna arnaıdy. Jumys barysynda keıipker ártúrli qıyndyqtarǵa tap bolady, oǵan jıi turmystyq zorlyq-zombylyq qurbandaryna kómektesýge jáne qylmystyq tergeýge qatysýǵa týra keledi.
Aıjannyń bóliminde birneshe qyzmetker bar. Olardyń árqaısynyń basynan túrli oqıǵalar ótken, biraq olar bárin jeńgen jáne eń bastysy óz mıssııalaryna adaldyqtaryn saqtap qalady.
«111 Juz on bir» telejobasynda elimizde turmystyq zorlyq-zombylyqtyń aldyn alý júıesin jetildirý, mundaı jaǵdaılarǵa jedel den qoıý sharalary, turmystyq zorlyq-zombylyq jasaǵandarǵa jazany qataıtý baǵytynda atqarylyp jatqan jumystar kórsetiledi. Al telehıkaıanyń eń mańyzdy habary taqyrypta kórsetilgen.
111 — otbasy, áıelder jáne balalar quqyǵy máseleleri boıynsha jan-jaqty kómek kórsetý qyzmetiniń qazirgi baılanys ortalyǵynyń nómiri.
111 — 24/7 jumys isteıdi, PD jáne óńirlerdiń jedel toptarymen baılanysta.
Balalarǵa qatysty zorlyq-zombylyq jahandyq problema bolyp qala beredi. Dúnıejúzilik densaýlyq saqtaý uıymynyń málimetinshe, álemde árbir úshinshi áıel ómir boıy zorlyq-zombylyqty bastan keshiredi jáne bul kóbinese óz úıinde bolady.
2024 jylǵy sáýirde Qazaqstanda Qazaqstan Respýblıkasynyń Prezıdenti Qasym-Jomart Toqaev «Qazaqstan Respýblıkasynyń keıbir zańnamalyq aktilerine áıelderdiń quqyqtaryn jáne balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zańǵa qol qoıdy.
Osyndaı ózekti taqyrypta telehıkaıa jasaý — turmystyq zorlyq-zombylyq máselesine qoǵamnyń nazaryn aýdarý jáne oǵan degen kózqarasty ózgertý jolyndaǵy mańyzdy qadam. Avtorlardyń aıtýynsha, fılm áıelderdi ózderin qurmetteýge, kómek pen quqyq qorǵaý organdaryna júginýden uıalmaýǵa shaqyrady.
Serıal jumysyna bilikti rejısserlik top tartylǵan: Beıbit Óner, Berik Jahanov, Modııar Abdýqadyrov jáne Evgenıı Palamarchýk.
Akterler quramy da jaqsy tańdalǵan. Serıaldan ataqty akterlerdi de, debıýtanttardy da kezdestirýge bolady.
Basty rólderdi Janel Serǵazına men Erkebulan Daıyrov somdaıdy. Jobaǵa sonymen qatar Asan Májıt, Ermek Shynbolatov, Jarqynaı Hanaıym, Aınur Bolat jáne t. b. qatysady. Prodıýseri Anar Júnisova men Anna Chakırtova.
Telekórermender «111 Juz on bir» dramasynyń birinshi bólimin 16 qyrkúıekte Jibek Joly telearnasynan tamashalaı alady.
Serıal jumys kúnderi saǵat 22:00–de kórsetiledi.
PS: 2021 jyly el Prezıdenti polıtsııa bólimderinde áıel tergeýshilerden jedel toptar qurýdy tapsyrdy. Al 2023 jyly Qaraǵandyda alǵashqy áıelder polıtsııasy bólimshesi ashyldy. Onyń quramynda psıhologtar, zańgerler, sot oryndaýshylary, ıývenaldyq polıtsııa, teologtar, volonterlar, medıatorlar, áleýmettik qyzmetkerler jáne t. b. bar.
Al 2024 jyly Іshki ister mınıstrligi qurylymynda jańa qyzmet — áıelderdi zorlyq-zombylyqtan qorǵaý bólimshesiniń paıda bolǵanyna 25 jyl boldy.
Ol áıelderdiń konstıtýtsııalyq quqyqtaryn, bostandyqtary men múddelerin zańsyz shabýyldardan qorǵaý, olarǵa zorlyq-zombylyq áreketteriniń aldyn alý jáne jolyn kesýde quqyqtyq kómek kórsetý maqsatynda qurylǵan.
Bólim polıtsııa men úkimettik emes sektorlardy, sondaı-aq memlekettik organdardy baılanystyrady.
