Qyrkúıek aıyndaǵy ınflıatsııa: óńirlerde baǵa qalaı ózgerdi

ASTANA. KAZINFORM — Ulttyq bank qyrkúıekte elde jyldyq ınflıatsııa 12,9% bolǵanyn málimdedi. Óńirlerdegi azyq-túlik, qyzmet kórsetý men taýarlardyń baǵa dınamıkasy qalaı qubyldy?

Ulttyq banktiń dereginshe, jyldyq ınflıatsııa 18 óńirde jedeldedi, bireýinde baıaýlap, 1 óńirde burynǵy deńgeıde qaldy.

— Qyrkúıekte azyq-túlik taýarlarynyń baǵasy jyldyq mánde 12,7%-dy qurady (tamyzda — 11,7%). Osy toptaǵy taýarlardyń baǵasy Ulytaý oblysynda (15,8%) joǵary ósim kórsetse, Almaty qalasynda (9,2%) eń tómen ósim tirkeldi, — delingen habarlamada.

Qyrkúıektiń qorytyndysy boıynsha azyq-túlikke jatpaıtyn taýarlardyń baǵasy jyldyq mánde 10,8%-ǵa ósti (tamyzda — 9,7%). Eń joǵary mán Aqtóbe oblysynda (13,2%), eń tómengi mán Almaty qalasynda (8,6%) tirkeldi.

Qyrkúıekte aqyly kórsetiletin qyzmet baǵasynyń ósý qarqyny jyldyq mánde ózgerissiz qaldy — 15,3% (tamyzda — 15,3%). Al, Qyzylorda oblysynda (9,6%) baǵa jalpy respýblıkalyq deńgeıden birshama tómen ósti.

Qyrkúıekte el kóleminde aılyq ınflıatsııa 1,1%-ǵa ósti.

Eske sala keteıik, buǵan deıin Ulttyq bank ınflıatsııanyń jedeldeýi halyqtyń naqty tabysyn qunsyzdandyryp otyrǵanyn aıtqan bolatyn.