Kırkorov pen Nurtas «Almaty Arena» muz saraıynda kontsert beredi
ASTANA. QazAqparat - Bıyl «Almaty Arena» muz saraıynda Fılıpp Kırkorov pen Qaırat Nurtastyń kontsertteri ótedi. Bul týraly búgin Úkimet otyrysynda Almaty qalasynyń ákimi Baýyrjan Baıbek habarlady, dep jazady QazAqparat tilshisi.
«Biz qazir jańa nysandardy belsendi túrde jarnamalaýdamyz. 5 qarashada «Almaty Arenada» jappaı syrǵanaý maýsymy ashyldy. Munda Almatynyń myń jyldyǵy, Mýzzon mýzykalyq syılyǵy, Qanat Islamnyń boks jekpe-jegi syndy birqatar saltanatty sharalar ótip úlgerdi. Barlyq sharalar kezinde zal adamdarǵa lyq toly boldy. Bıletter 100% satylyp ketedi», - dedi Baýyrjan Baıbek.
Onyń aıtýynsha, jyl sońyna deıin bul nysanda taǵy 8 iri shara ótedi.
«Bul fýtzaldan ÝEFA kýbogynyń raýndy, mánerlep syrǵanaýdan ulttyq chempıonat, Fılıpp Kırkorovtyń, Qaırat Nurtastyń kontsertteri jáne t.b. ıAǵnı, biz jyl sońyna deıin nysannyń tehnıkalyq parametrlerin tekseretin bolamyz, bul nysanda Ýnıversıadanyń ashylý jáne jabylý saltanaty ótedi. «Halyq Arena» da óz jumysyn bastap ketti, arǵy kúni jappaı syrǵanaý maýsymy bastalady jáne «Almaty» hokkeı komandasynyń oıyndary ótedi», - dep tolyqtyrdy B.Baıbek.
