Kirister men múlikterdi deklaratsııalaý júıesi engizilgen soń, kóleńkeli ekonomıkanyń deńgeıi tómendeıdi - sarapshy E. Badyhan
ALMATY. QazAqparat - Búgin Almatyda ótken «Kiristerdi deklaratsııalaý: qoldaýshylar men qarsylar» atty dóńgelek ústel barysynda Investıtsııalardyń tıimdiligin zertteý boıynsha agenttiktiń aǵa sarapshysy Erlen Badyhan kirister men múlikterdi deklaratsııalaý júıesi engizilgen soń, kóleńkeli ekonomıkanyń deńgeıi tómendeıtinin málim etti.
Onyń aıtýynsha, kóleńkeli ekonomıka negizinen shıkizat jáne qarjy salasyndaǵy qýlyq-sumdyqtardan quralady. Buǵan sonymen qatar, elge ımporttyq ónimderdi jasyryn alyp kelý áreketterin de qosýda bolady.
«Árıne, kirister men múlikterdi jalpyǵa birdeı deklaratsııalaý júıesi engizilgen soń, kóleńkeli ekonomıkanyń deńgeıi qandaı da bir paıyzǵa tómendeıtini anyq. Biraq báribir kútkendeı bolmaıdy dep oılaımyn. Óıtkeni, halyqty tolyq qamtý óte qıyn. Mysaly, aýyl turǵyndary ne isteıdi? Endi olardyń jyl saıyn aýdan ortalyqtaryna baryp, saǵattap kezekke turyp, deklaratsııa tapsyrýlaryna týra keledi. Onyń ústine deklaratsııa qabyldaý ortalyqtary áli daıyndalmaǵan», - dedi Erlen Badyhan.
Esterińizge sala keteık, «QR keıbir zańnamalyq aktilerine Qazaqstan azamattary men mekendeý qaǵazdary bar tulǵalardyń kiristeri men múlikterin deklaratsııalaý máseleleri boıynsha ózgerister men túzetýler engizý týraly» Zań jobasyna sáıkes, deklaratsııany 2015 jyldan bastap kezeń-kezeńmen engizý josparlanýda. Al búkil eldi qamtý 2017 jyly aıaqtalady dep kútilýde.
Ázirge bul júıeni júzege asyrýdyń birneshe mehanızmi belgili bolyp otyr. Olar deklaratsııany onlaın rejiminde, ıaǵnı elektrondy túrde tapsyrý jáne poshta arqyly jiberý. Biraq olardyń ózi sarapshylardyń synyna ushyrady.
«Men bul jerde birqatar máselelerdi aıtqym keledi, - dedi Erlen Badyhan.- Bylaı qarasa, túk qıyndyǵy joq sekildi. Kompıýterge otyrdyń da deklaratsııany toltyryp, jibere saldyń. Shyn mánisinde elimizde adamdardyń kópshiliginiń kompıýterlik saýattylyǵy tómen. Onyń ústine eldi mekenderdiń barlyǵynda birdeı ınternet bar dep aıta almaımyn. Al eger bul júıe egov.kz platformasyna biriktiriletin bolsa, onda kóptegen qıyndyqtar týyndaıdy. Deklaratsııa tapsyrý kesheýildeıdi. Al poshta arqyly da qıyndyqtar jetip artylady. Mysaly Qazposhta mıllıondaǵan blankti qalaı jiberedi? Halqymyzdyń sany 17 mıllıonnan asty. Al myna jańa júıe boıynsha endi árbir jańa týǵan náresteden bastap, eńkeıgen qarttarǵa deıin deklaratsııa toltyrýlary kerek bolady. Árıne, blankilerdi olar úshin basqa adam toltyrǵannyń ózinde munshama qujatty jiberý ońaı emes. Al eger salyq tóleýshiler blankiler úshin de, olardy jiberý úshin de aqsha tóleıtin bolsa, bul men úshin túsiniksiz jáıt» - dedi E. Badyhan.
Sonymen qatar ol, eger deklaratsııalyq blankiler ortalyqtandyrylǵan ádis boıynsha basyp shyǵarylatyn bolsa, onda mundaı qymbat memlekettik tapsyrysty keıbir sheneýnikter óz baspahanalaryna tyqpalaýy múmkin ekendigin de joqqa shyǵarmady.
