Kirister komıteti valıýtaǵa qatysty jaýapkershilik týraly eskertti

NUR-SULTAN. QazAqparat – Shet eldik valıýtany jáne altyn quımalaryn syrtqa alyp ketýge qoıylǵan shekteýge baılanysty QR Qarjy mınıstrliginiń Memlekettik kirister komıteti elimizdiń aýmaǵynan shyǵatyn azamattarǵa tıisti túsindirme berdi.

Memlekettik kirister komıtetiniń Memlekettik shekaradan ótý kezinde kidiristerge jol bermeý úshin ózimen birge (bagajda) bar qolma-qol aqshany aldyn ala eseptep shyǵýǵa keńes berildi.

Qolma-qol aqsha men sheteldik valıýtadaǵy aqsha quraldary somasynyń balamasy Qazaqstan Respýblıkasy Ulttyq Bankiniń baǵamy boıynsha 10 000 (on myń) AQSh dollarynan aspaýy qajet. Sondaı-aq, Qazaqstan Respýblıkasynyń Ulttyq Banki shyǵaratyn affınırlengen altynnyń 5, 10, 20, 50 jáne 100 gramm altyn quımalary jáne «ALTYN BARYS» altynynan jáne «KÚMIS BARYS» kúmisinen jasalǵan ınvestıtsııalyq monetalardyń, sondaı-aq 100 gramnan asatyn affınırlengen altyndy ózimen birge (bagajda) alyp ketýge bolmaıdy.

Tyıym salý buzylǵan jaǵdaıda, tulǵalar Qazaqstan Respýblıkasynyń zańnamasyna sáıkes ákimshilik nemese qylmystyq jaýapkershilikke tartylady. Ákimshilik jaýapkershilikke tartylǵan jaǵdaıda on bes aılyq eseptik kórsetkish mólsherinde (45,9 myń teńge) aıyppul salynady. Sondaı-aq, sottyń sheshimi boıynsha atalǵan aqsha men taýar memleket kirisine tárkilenýi múmkin.

Osyǵan deıin Qazaqstan Respýblıkasy Prezıdentiniń «Qazaqstan Respýblıkasynyń qarjylyq turaqtylyǵyn qamtamasyz etý jónindegi sharalar týraly» 2022 jylǵy 14 naýryzdaǵy № 830 Jarlyǵymen Qazaqstan Respýblıkasynan ketetin tulǵalarǵa shet eldik valıýtany jáne altyn quımalar men monetalardy alyp shyǵýǵa shekteý qoıylǵan bolatyn.