Kirister komıteti múlik salyǵyn tóleý qajettigin eskertti

ASTANA. QazAqparat – Memlekettik kirister komıteti 1 qazanda 2022 jyl úshin jyljymaıtyn múlik jáne jer ýchaskeleri menshik ıeleriniń múlik salyǵyn tóleý merzimi aıaqtalatynyn eske salady, dep habarlaıdy QazAqparat.

Jeke tulǵalardyń múlik salyǵynyń somasy «Azamattarǵa arnalǵan úkimet» Memlekettik korporatsııasy jyl saıyn salyq salý maqsatynda aıqyndaıtyn obektileriniń qunyna baılanysty esepteledi.

Jeke tulǵalardyń salyq salý obektileri boıynsha salyqty esepteýdi salyq organdary salyq tóleýshiniń turǵylyqty jerine qaramastan, salyq salý obektisiniń ornalasqan jeri boıynsha esepti salyqtyq kezeńnen keıingi jyldyń 1 shildesinen keshiktirmeı júrgizedi.

Salyqty esepteý kezinde jeke tulǵalardyń salyq salý obektileri boıynsha menshik quqyǵynda ıelenýdiń is júzindegi merzimin eskere otyryp, salyqtyq bazaǵa tıisti salyq stavkasy qoldanylady.

1 qańtar – 31 jeltoqsan aralyǵyndaǵy kúntizbelik jyl – jeke tulǵalardyń múlik salyǵyn esepteý úshin salyq kezeńi.

Birlesken ortaq menshiktegi salyq salý obektileri boıynsha ózderiniń arasyndaǵy kelisimmen osy salyq salý obektisi menshik ıeleriniń biri salyq tóleýshi bola alady.

Birneshe jeke tulǵanyń ortaq úlestik menshigindegi salyq salý obektisi úshin salyq olardyń osy múliktegi úlesine proportsıonaldy esepteledi.

Salyq zańnamasyna sáıkes aldaǵy salyq somalary boıynsha habarlamalar shilde aıynda menshik ıelerine jiberildi.

Sonymen qatar, salyq organdarymen eseptelgen salyq somasy týraly habarlamalar elektrondy tásilmen salyq tóleýshiniń kabınetine, Egov portalyna, qaǵaz túrinde – tapsyrys hatpen poshta arqyly, sondaı-aq ERTs, ALSEKO jáne t.b. kommýnaldyq qyzmetterdiń túbirtek-habarlamalarymen joldanady.

Al, ekinshi deńgeıdegi bankterden push-habarlamalar túsken jaǵdaıda, múlik salyǵynyń aldaǵy somalaryn, MKK eseptelgen salyq somalarynyń durystyǵyn «e-salyq Azamat» mobıldi qosymshasynda «Elektrondy servıster» → «JT jáne JK aldaǵy tólemderdi tóleý qyzmeti» servısinde, «Kaspi.kz» mobıldi qosymshasynda «Tólemder» → «Aıyppul, salyq» → «Salyq» → «Múlik jáne kólik salyǵy» siltemeleri arqyly tekserýge bolady.