Qyrym tatarynan dombyra úırendim – japon kúıshisimen suhbat
ASTANA. KAZINFORM — Sońǵy kezderi áleýmettik jelide dombyra shertken japon azamatynyń beınejazbasy kórermenniń qoshemetine bólendi. Qazirge deıin 1,5 mıllıonǵa jýyq qaralym jınap úlgergen vıdeony Tokıoda jumys isteıtin qazaqstandyq kásipker taspalaǵan. Vıdeonyń avtory men keıipkeri «Búgin LIVE» baǵdarlamasyna onlaın baılanysqa shyǵyp suhbat berdi.
– Qazir men júktegen vıdeo 1,4 mln qaralym jınady. Ózim Tokıoda japon kompanııasynda jumys isteımin. Kúndelikti jumystarymmen ketip bara jatqanda jaqyn mańaıdan dombyranyń daýysyn estidim. Sol sátti ótkizip almaý úshin birden telefonymnyń kamerasyn qosyp, kúı oınap jatqan adamnyń qasyna barsam, japon jigiti oryndap otyr eken. Ol jigittiń esimi Akıra Takegýchı. Osy jaǵdaıdan keıin jaqsylap tanysyp, dostasyp kettik, – deıdi Eldos Súgirbaı.
Al japondyq kúıshi dombyra tartýdy Túrkııada turatyn noǵaı azamatynan úırengen eken.
– Birneshe jyl buryn túrki elderiniń tarıhyna kóńilim aýǵan edi. Sol úshin Túrkııaǵa baryp oqydym. Túrikter men qazaqtardyń shyǵý tegi uqsas bolǵandyqtan, dombyramen tanystym. Sol kezde men qyrym tatarynyń, ıaǵnı noǵaı azamatynyń úıinde turdym. Ol kisi dombyra sherte alatyn edi. Maǵan dombyrada oınaýdy sol kisi úıretti. Solaı Túrkııada júrip dombyrany úırendim, – deıdi Akıra Takegýchı.
Akıra búginge deıin kúıshi, dombyrashy Seken Turysbekpen de kezdesip úlgeripti. Birneshe ret Qazaqstanda da bolǵan. Oǵan qosa, birtalaı kúıdi oryndaı alady. Japondyq kúıshi jaqynda kontsert berýdi josparlap otyrǵan kórinedi.
Aıta keteıik, kúni keshe Japonııada voleıboldan Azııa chempıondar lıgasynyń oıyndary bastaldy.