Qyryq kıiktiń etin tıegen kólik: mal ónimderin tasymaldaý erejesi buzylǵan

Áleýmettik jelide taraǵan kólikke tıelgen qyryq kıiktiń etin tasymaldaý deregine baılanysty polıtsııa ákimshilik quqyqbuzýshylyqty anyqtady, dep habarlaıdy Kazinform.

Aqmola oblysy PD baspasóz qyzmetiniń málimetinshe, qazannyń 23-inde polıtsııa qyzmetkerleri «Astana-Qorǵaljyn» avtojolynda 40 kıiktiń eti tıelgen «Jac» kóligin toqtatqan.

Tekseris barysynda júrgizýshiniń Qorǵaljyn aýdany Sabyndy aýylynda ornalasqan «Astana Agroprodýkt» et kombınatynan ekeni anyqtaldy.

- Tasymaldaýshy júkqujattardyń túpnusqalaryn jáne «Ohotzooprom boıynsha» RMQK men «Astana Agroprodýkt» JShS arasynda jasalǵan taýardy ótkizý/jetkizý shartynyń elektrondy kóshirmesin usyndy. Sondaı-aq, Aqmola oblysynyń aýmaǵynda kıikterdiń popýlıatsııasyn retteý týraly № 688 Úkimet qaýlysy da bary anyqtaldy, - dep túsindirdi PD baspasóz qyzmetinen.

Vedomstvodan atap ótkendeı, kıiktiń etin tasymaldaý deregi Tselınograd aýdandyq polıtsııa bóliminiń aqparatty esepke alý kitabynda tirkelgen.

- Tekserý materıaldary QR ÁQBtK 406-babyna sáıkes mal ónimderin tasymaldaý erejelerin buzǵany úshin ákimshilik jaýapkershilikke tartý maqsatynda veterınarııalyq ınspektsııaǵa jiberildi, - dep tolyqtyrdy vedomstvodan.

Aıta ketsek, budan buryn Aqmola oblysynda kıikterden 76,9 myń gektar egistikke zııan kelgenin jazǵan edik.