Qyrǵyzstan shekara qyzmeti aýyr qarý-jaraqtan bas tartty

ASTANA. KAZINFORM – Qyrǵyz Respýblıkasynyń Ulttyq qaýipsizdik memlekettik komıtetiniń tóraǵasy Kamchybek Tashıev Osh oblysynyń Choń-Alaı aýdanynda shekarashylarǵa páter kiltterin tapsyrý rásiminde shekara qyzmetinde aýyr qarý-jaraqty qoldaný tártibi túbegeıli ózgeretinin málimdedi, dep habarlaıdy Kazinform agenttiginiń menshikti tilshisi. 

Onyń aıtýynsha, qazirgi tańda Qyrǵyzstan shekarasynda jer daýy máselesi tolyq sheshilgen, daýly aımaqtar qalmaǵan.

— Buryn qarýly qaqtyǵystar bolyp, shekarany qorǵaǵan talaı batyrlarymyz qaza tapty. Endi mundaı jaǵdaılar qaıtalanbaıdy dep senemin, óıtkeni endi bóletin jer joq. Biz beıbitshilik pen tatýlyqta ómir súremiz, — dedi Kamchybek Tashıev.

Ol sonymen qatar shekaradaǵy aýyr tehnıka men qarý tolyqtaı áketiletinin, al shekarashylarda tek jeńil atys qarýy ǵana qalatynyn aıtty.

— Bul sheshim kórshi memlekettermen kelisim negizinde qabyldandy. Shekara qyzmeti endi jeńildetilgen tártipte jumys isteıdi, — dedi ol.

Aıta keteıik, 2025 jylǵy aqpanda Qyrǵyzstan men Tájikstan shekara máselesin tolyq rettep, memleket basshylary Memlekettik shekara týraly shartqa qol qoıǵan bolatyn.

Al 31 naýryzda Hýjand qalasynda Qyrǵyzstan, Tájikstan jáne Ózbekstan prezıdentteri úsh el shekarasynyń túıisý núktesi týraly kelisim men «Máńgilik dostyq jónindegi Hojant deklaratsııasyn» qabyldady.