Qyrǵyzstannyń JІÓ kólemi 1,8 trln somnan asty

ASTANA. KAZINFORM — Qyrǵyzstannyń jalpy ishki ónimi on aıda 1 trln 866,4 mlrd somǵa jetip, ótken jyldyń osy kezeńimen salystyrǵanda 10,5 paıyz ósti.

Qyrǵyzstannyń JІÓ kólemi 1,8 trln somnan asty
Foto: Kabar.kg

Qyrǵyzstan Ulttyq statıstıka komıtetiniń málimetinshe, buǵan taýar óndirý salalary men qyzmet kórsetý sektoryndaǵy óndiris kóleminiń, sondaı-aq ónimderge salynatyn salyq túsimderiniń artýy áser etken.

JІÓ qurylymynda qyzmet kórsetý salasy 48,9 paıyzdyq úlespen kósh bastady. Al ónerkásiptiń úlesi 18,2 paıyz bolsa, aýyl sharýashylyǵy 8,4 paıyz, qurylys 9,4 paıyz, ónimderge salynatyn salyqtar 15,1 paıyz boldy.

2026 jyldyń qańtar-qazan aılarynda ónerkásip ónimderiniń kólemi 770,9 mlrd somǵa jetti. Bul kórsetkishtiń ósýine tamaq ónimderi (sýsyndardy qosa alǵanda) men temeki óndirisiniń 10,1 paıyzǵa, farmatsevtıkalyq ónimderdiń 13,5 paıyzǵa, qurylys materıaldarynyń 29,3 paıyzǵa, aǵash jáne qaǵaz buıymdary men baspa ónimderiniń 36,5 paıyzǵa, kólik quraldarynyń 38,3 paıyzǵa artýy áser etti. Buǵan qosa tazartylǵan munaı ónimderin óndirý 1,8 ese, hımııa ónimderin óndirý 2,4 ese, paıdaly qazbalardy óndirý 7,5 paıyz ósti.

Sondaı-aq qurylys salasynda da oń ósim baıqaldy. Munda jumys kólemi 1,6 ese artqan. Al aýyl sharýashylyǵyndaǵy ósim 4,7 paıyzdy, kóterme jáne bólshek saýdadaǵy ósim 4,3 paıyzdy qurady.

Budan bólek 2026 jyldyń qańtar-qazan aılarynda Qyrǵyzstanda tutyný baǵalary men qyzmet tarıfteri 8,8 paıyz kóterildi. Atap aıtqanda, azyq-túlik pen alkogolsiz sýsyndar 7,7 paıyz, alkogoldi ishimdikter men temeki ónimderi 8 paıyz, azyq-túlikke jatpaıtyn taýarlar 7,6 paıyz, al qyzmet tarıfteri 12,2 paıyz ósken.

Buǵan deıin Qyrǵyzstanda jyl basynan bergi toǵyz aıda tutyný baǵalary men tarıfter 8,1 paıyz óskeni habarlanǵan edi.