Qyrǵyzstannyń UQMK eks-basshysynyń qylmystyq isi sotqa joldandy
BІShKEK. KAZINFORM — Qyrǵyzstannyń Bas prokýratýrasy Ulttyq qaýipsizdik memlekettik komıtetiniń (UQK) burynǵy tóraǵasy Kamchybek Tashıevke qatysty qylmystyq is boıynsha aıyptaý aktisin bekitti, dep habarlaıdy Kazinform agenttiginiń Bishkektegi menshikti tilshisi.
Arnaıy qyzmet burynǵy basshysynyń advokaty Ikramıdın Aıtqulovtyń aıtýynsha, is Bishkek qalasynyń Pervomaı aýdandyq sotyna qaraýǵa berildi. Kamchybek Tashıev bılikti kúshtep basyp alýdy josparlady jáne qyzmet babyn asyra paıdalandy dep aıyptalyp otyr.
— Onymen birge is boıynsha taǵy jeti aıyptalýshy bar. Qylmystyq is qupııalanǵan. Bul barlyq sot otyrysy jabyq bolady jáne eshkimniń tergeý nemese sot otyrysynyń derekterin jarııa etýge quqyǵy joq degendi bildiredi, — dep jazdy ol áleýmettik jelide.
Eske salsaq, 10 aqpanda Qamchybek Tashıev mınıstrler kabıneti tóraǵasynyń orynbasary — UQMK tóraǵasy qyzmetinen bosatyldy. UQMK basshysynyń aýysýynan keıin tóraǵanyń úsh orynbasary qyzmetinen bosatyldy.
Keıin Qyrǵyzstan prezıdenti Sadyr Japarov Kamchybek Tashıevtiń Mınıstrler kabıneti tóraǵasynyń orynbasary – Ulttyq qaýipsizdik memlekettik komıtetiniń tóraǵasy qyzmetinen ketýine qatysty túsinik berdi.
Qyrǵyzstannyń Ulttyq qaýipsizdik memlekettik komıtetine jańa basshy taǵaıyndaldy.
Osyǵan deıin Qyrǵyzstanda UQMK burynǵy basshysynyń inisi Shaırbek Tashıev 16 mamyrǵa deıin qamaýda otyratyny habarlandy.
Buǵan deıin Qyrǵyzstan Іshki ister mınıstrligi eks-depýtattyń «Qyrǵyzneftegaz» ashyq aktsıonerlik qoǵamyndaǵy jemqorlyq isi aıasynda ustalǵanyn habarlaǵan.
