Qyrǵyzstannyń shoǵyrlandyrylǵan bıýdjeti 1 trln somnan asty

BІShKEK. KAZINFORM — Eldiń 2025 jylǵy shoǵyrlandyrylǵan bıýdjeti alǵash ret 1 trln 93 mlrd somǵa jetti. Bul týraly mınıstrler kabınetiniń basshysy Adylbek Qasymalıev Jogorký Kenesh komıtetteriniń keńeıtilgen otyrysynda málimdedi, dep habarlaıdy Kazinform menshikti tilshisi. 

Adylbek Qasymalıev memleket ekonomıkasy turaqty damý kórsetýin jalǵastyryp otyrǵanyn atap ótti. 2025 jyly eldiń shoǵyrlandyrylǵan bıýdjeti alǵash ret 1 trln somdyq tarıhı mejeden asty. Bul kórsetkishke josparlanǵan merzimnen eki jyl buryn qol jetkizildi.

— 2025 jyly strategııalyq salalarǵa, sonyń ishinde «Eldık Bank» pen energetıkalyq kompanııalardy kapıtaldandyrýǵa, Qytaı-Qyrǵyzstan-Ózbekstan temirjolyn, Qambarata-1 sý elektr stantsııasyn jáne Memlekettik ıpotekalyq kompanııany salýǵa qomaqty bıýdjettik qarajat bólinedi. Kapıtaldyq salym kólemi bes ese artty — 10 mlrd somnan 51,7 mlrd somǵa deıin, — dep baıandady úkimet basshysy.

2024 jyldyń qorytyndysy boıynsha jan basyna shaqqandaǵy JІÓ 2513 AQSh dollaryn qurady, bul 2021 jylmen salystyrǵanda 86%-ǵa kóp. Bul kórsetkish 2025 jyly 2800 AQSh dollaryna deıin artady dep boljanyp otyr.

Qarasha aıynyń sońynda Qyrǵyzstan Ulttyq banki eseptik mólsherlemeni 11%-ǵa deıin kótergenin jazǵan bolatynbyz. 

Sondaı-aq Qyrǵyzstanda tutyný baǵalary men tarıfteri osy jyldyń alǵashqy 10 aıynda 2024 jyldyń jeltoqsanymen salystyrǵanda 8,3%-ǵa óskenin habarladyq.