Qyrǵyzstannyń ońtústiginde ultaralyq arandatýshylyq jasaýǵa daıyndalyp jatyr
ASTANA.KAZINFORM — Qyrǵyzstan prezıdenti Sadyr Japarov eldiń ońtústiginde ultaralyq arandatýshylyq jasaýǵa daıyndyq áreketteri bolǵany týraly eskertip, halyqqa resmı úndeý jarııalady, dep habarlaıdy Kazinform agenttiginiń Bishkektegi menshikti tilshisi.
Bul málimdemege belgili bir saıası kúshterdiń 2027 jyldyń 27 qańtaryna belgilengen prezıdent saılaýy qarsańynda qyrǵyzdar men ózbekter arasynda qaqtyǵys týdyrý josparlary týraly habarlamalar sebep boldy.
Qyrǵyzstan basshysynyń aıtýynsha, teris nıetti keıbir saıasatkerler daýys berý protsesin buzý úshin eldiń ońtústik aımaqtaryndaǵy jaǵdaıdy turaqsyzdandyrýǵa tyrysyp jatyr. Qytaı-Qyrǵyzstan-Ózbekstan temirjol qurylysyna narazylyq týdyrý áreketteri sátsiz aıaqtalǵannan keıin bul kúshter qaýesetterdi qyrǵyzdar men ózbekter arasynda etnıkalyq jekkórýshilikti qozdyrý úshin paıdalanýy múmkin.
Japarov qyrǵyzstandyqtardy arandatýshylyqqa boı aldyrmaýǵa jáne qaqtyǵysqa tartylmaýǵa shaqyrdy. Ol aǵa býyn ókilderin 1990 jáne 2010 jyldardaǵy qaıǵyly oqıǵalardy bastan keshirmegen jastarǵa ultaralyq qaqtyǵystardyń aýyr saldaryn túsindirýge shaqyrdy.
Qyrǵyzstan prezıdenti memlekettiń tártipsizdikterdi tez arada basýǵa jetkilikti kúshteri men tehnıkalyq múmkindikteri bar ekenin atap ótti, el boıynsha ondaǵan myń beınekamera jumys istep turǵanyn, uıymdastyrýshylar sózsiz jazalanatyny týraly eskertti.
Sadyr Japarov azamattardan kez kelgen dezınformatsııa nemese arandatýshylyq málimdemeler týraly memlekettik ulttyq qaýipsizdik komıtetiniń jergilikti bólimshelerine, Іshki ister mınıstrligine jáne jergilikti bılik organdaryna dereý habarlaýdy surady.
— Qyrǵyzstanǵa jáne onyń barlyq halqyna tek beıbitshilik pen turaqtylyq qajet! Halyq 30 jyl boıy haostan qalaı qutyla almaı, aqyrynda batpaqqa batqanymyzdy áli umytqan joq. Endi ǵana odan shyǵyp, senimdi túrde alǵa jyljı bastadyq. Kedergiler jasamańyzdar! — delingen úndeýde.
Eske sala keteıik, Qyrǵyzstandaǵy prezıdent saılaýy 2027 jyldyń 27 qańtaryna josparlanǵan.
Sadyr Japarov Qyrǵyzstan prezıdenttigine óz kandıdatýrasyn usyndy.
