Qyrǵyzstannyń memlekettik organdaryna jyl sońyna deıin eldegi barlyq úıdi saqtandyrý tapsyryldy
ASTANA.KAZINFORM – Qyrǵyzstan Mınıstrler Kabınetiniń tóraǵasy Aqylbek Japarov sel saldaryn joıýǵa arnalǵan keńeste múddeli memlekettik organdarǵa 2024 jyldyń sońyna deıin eldegi barlyq úıdi saqtandyrýdy tapsyrdy.
Qyrǵyzstan Tótenshe jaǵdaılar mınıstrliginiń málimeti boıynsha, 2024 jyldyń qyrkúıegindegi jaǵdaı boıynsha elde 331 sel oqıǵasy tirkelgen. Zardap shekken 5 354 úıdiń 102-si zaqymdandy, 138-i kúrdeli jóndeýdi qajet etedi.
Aqylbek Japarov quzyrly memlekettik organdardyń aldyna 2024 jyldyń sońyna deıin barlyq úıdi, sonyń ishinde qaýipti aımaqta ornalasqan úılerdi saqtandyrý mindetin qoıdy. Bul mundaı jaǵdaı qaıtalanǵan jaǵdaıda azamattardy qarjylyq qorǵaýdy qamtamasyz etip, baspanasynan aıyrylǵan otbasylar úshin zardaptardy barynsha azaıtatyny aıtyldy. Onyń pikirinshe, saqtandyrý halyqtyń tabıǵı apattan tezirek saýyǵyp, memleket bıýdjetine túsetin aýyrtpalyqty azaıtýǵa kómektesetin mańyzdy quralǵa aınalady.
– Jahandyq jylynýǵa baılanysty jyl ótken saıyn tabıǵı apattar sany artyp keledi. Osyǵan baılanysty jyljymaıtyn múlikti saqtandyrý halyqtyń qaýipsizdigi men tabıǵı apat zardaptaryna tózimdiligin qamtamasyz etetin qajetti sharaǵa aınalady, - dedi ol.
Esterińizge sala keteıik, maýsym aıynyń sońynda Osh oblysynyń Nookat aýdanynda joıqyn sel júrip, turǵyndar men týrıster qurban bolǵan bolatyn. Qaza tapqandar arasynda qazaqstandyq kámeletke tolmaǵan balalar da bar. Apat saldarynan 2 kópir men 10 elektr baǵanasyn sý shaıyp, 30 turǵyn úı men aýlany, balabaqshany sý basqan.
Al, 14 shilde kúni Oshta bolǵan joıqyn sel saldarynan bir áıel úsh qyzymen birge qaza tapty.
Tamyz aıynda Ystyqkól oblysynyń keıbir aýdandarynda nóser jaýynnan keıingi sel tasqynynan kólikterdiń júrýine shekteý qoıylǵan birqatar joldardy sý basyp, 497 úıdi, 3 áleýmettik nysan men mádenıet úıin sý basqan.
