Qyrǵyzstannyń Qytaı aldyndaǵy syrtqy qaryzy 1,4 mlrd dollarǵa deıin azaıdy
AQTAÝ. KAZINFORM — Qyrǵyzstannyń Qytaı aldyndaǵy syrtqy qaryzy 1,9 mlrd dollardan 1,4 mlrd dollarǵa deıin qysqardy. Bul týraly Qyrǵyz Respýblıkasy Prezıdenti ákimshiliginiń basshysy ári Mınıstrler kabıneti tóraǵasy Adylbek Qasymálıev málimdedi, dep habarlaıdy Kabar.
Onyń aıtýynsha, búginde Qytaı aldyndaǵy bereshek eldiń jalpy syrtqy qaryzynyń 20 paıyzdan sál astamyn ǵana quraıdy. Qalǵan bóligi negizinen Azııa damý banki, Dúnıejúzilik bank, Halyqaralyq valıýta qory jáne basqa da kredıtorlardyń uzaq merzimdi jeńildetilgen nesıelerinen turady.
Adylbek Qasymálıevtiń aıtýynsha, Qyrǵyzstan zańnamasyna sáıkes memlekettik qaryzdyń jalpy ishki ónimge shaqqandaǵy úlesi 60 paıyzdan aspaýy tıis. Alaıda Prezıdent Sadyr Japarovtyń tapsyrmasymen bul shek 50 paıyz deńgeıinde belgilengen.
Qazirgi ýaqytta Qyrǵyzstannyń memlekettik qaryzy JІÓ-niń 42 paıyzyn, al syrtqy qaryzy 22 paıyzyn quraıdy. El bıligi syrtqy qaryz kólemin azaıtyp, ishki qaryzdy kezeń-kezeńimen ulǵaıtý saıasatyn ustanyp otyr. Buǵan deıin Qyrǵyzstannyń syrtqy qaryzyn 2035 jylǵa deıin tolyq óteýdi josparlap otyrǵany habarlanǵan.
Aıta ketelik Qyrǵyzstan men Ózbekstan taýar aınalymyn 2 mlrd dollarǵa deıin arttyrýdy kózdep otyr.
