Qyrǵyzstannyń qazirgi memlekettik qaryzy qansha
ASTANA. KAZINFORM – Qyrǵyzstannyń qaryzy 8,9 mlrd dollarǵa jetti. Onyń 5,3 mlrd dollary syrtqy qaryz bolsa, 3,6 mlrd dollary ishki qaryzǵa tıesili, dep habarlaıdy Kabar.
Bul týraly qarjy vıtse-mınıstri – Ortalyq qazynashylyq dırektory Úmitjan Amanbaev málimdedi.
— Syrtqy qaryzdar ratıfıkatsııadan keıin ınfraqurylymdyq jáne ekonomıkalyq jobalardy iske asyrýǵa baǵyttalady. Bıyl seriktes memlekettermen jasalǵan kelisimder aıasynda shamamen 28 mlrd, al keıbir baǵyttar boıynsha 35 mlrd-qa jýyq qarajat negizinen mektepter men jol salýǵa jumsalady. Mundaı jobalar ekonomıkanyń, sonyń ishinde jalpy ishki ónimniń ósýine áser etedi. Óıtkeni jańa jumys oryndary ashylyp, salyq túsimderi artady, — dedi ol.
Amanbaev Qytaıǵa tıesili qaryz máselesine de toqtaldy. Qazir Qytaıǵa bereshek $1,4 mlrd-ty quraıdy. Onyń jalpy memlekettik qaryz kólemindegi úlesi 27%-dan tómendedi. Buǵan deıin bul kórsetkish 40% bolǵan.
— 2020 jyldarǵa deıin Qytaıǵa bereshek jalpy qaryz kóleminiń 80-90%-yn qurady. Keıbir kezeńderde onyń mólsheri bıýdjet kirisiniń 100%-yna deıin jetti. Al bıylǵy jeti aıdyń qorytyndysy boıynsha bul kórsetkish 16%-ǵa deıin tómendedi. Demek, qazirgi tańda Qytaıǵa bereshekti tolyq óteýge qarjylyq áleýetimiz jetkilikti. Qaryzdyń kólemi bıýdjetimizdiń 16%-yna ǵana teń. Ony óteýdiń arnaıy tetikteri de qarastyrylǵan, — dep atap ótti Úmitjan Amanbaev.
Buǵan deıin Qyrǵyzstan Qytaıǵa qaryzyn 2035 jylǵa deıin tolyq óteıtini habarlanǵan edi.
