Qyrǵyzstannyń halyq sýretshisi pavlodarlyq mýzeıge Sátbaevtyń portretin syılady
PAVLODAR. KAZINFORM – Pavlodarda Qazaqstannyń Halyq sýretshisi Naǵymbek Nurmuhammedovtyń 100 jyldyǵyna arnalǵan halyqaralyq plener ótti. Kásibı sýretshiler men ónertanýshylardy, shyǵarmashyl jastardy biriktirgen mádenı is-shara klassıkalyq jáne zamanaýı óner úderisterin qoldaýdyń biregeı platformasy retinde tanyldy.
«ART-TÓR 2024» atalǵan halyqaralyq plenerde túrli kádesyılardyń jáne Naǵymbek Nurmuhammedov salǵan sýretter katalogynyń tusaýkeseri jasaldy. Qurmetti qonaqtar qatarynda áıgili sýretshiniń qyzy, ónertanýshy Mara Naǵymbekqyzy, ıÝNESKO Sýretshiler odaǵynyń múshesi, reseılik Andreı Blıok (Reseı), Qyrǵyzstannyń Halyq sýretshisi ıÝrıstanbek Shygaev, ázerbaıjandyq sýretshi Djalal Agaev, sondaı-aq basqa da otandyq jáne sheteldik tanymal qylqalam sheberleri boldy.
Naǵymbek Jelal-Ád-Dınulynyń eńbek joly negizinen Almaty qalasynda órilgen. Asa aýqymdy shyǵarmashylyǵy odaqqa tanylyp, respýblıkalyq, búkilodaqtyq jáne halyqaralyq kórmelerge belsene qatysqan. Óner ıesi etıýdter men bolashaq kartınalarǵa arnalǵan materıaldaryn negizinen el boıynsha jáne sheteldik saıahattarda jınaǵan. Ony biletinder tulǵanyń sýretshi ǵana emes, belsendi qoǵam qaıratkeri, ónertanýshy bolǵanyn aıtady. Qazaqstannyń ejelgi jáne qazirgi zamanǵy óneri týraly kóptegen maqalalar men kitaptar jazǵan.
— Nurmuhammedovtyń shyǵarmashylyǵyn meniń otanymdaǵy áriptesterim jaqsy biledi. Ony Qazaqstannyń birden-bir klassık sýretshileriniń biri bolǵan dep esepteımiz. Jumystary óte joǵary kásibı deńgeıde salynǵan. Ol kisiniń shákirtteri shyǵarmashylyq joldy laıyqty jalǵastyryp otyrǵany qýantady. Mundaı sheberlerdiń eńbegin árdaıym ulyqtap, týyndylaryn altyndaı saqtaýǵa mindettimiz. Men de ol sııaqty Reseıdegi Repın atyndaǵy akademııany támamdadym. Bul kórmege erekshe tartýym bar. Álemge áıgili ǵalym Qanysh Sátbaevtiń 125 jyldyǵyna oraı ǵulamanyń portretin salyp keldim. Ony mýzeı qoryna ótkizemin, - dedi Qyrǵyzstannyń Halyq sýretshisi ıÝrıstanbek Shygaev.
Pavlodar oblystyq kórkemsýret mýzeıi 1964 jyly qurylǵan, Ertis óńirindegi eń iri mýzeı. Bıyl qurylǵanyna 60 jyl otyr. Osy ýaqyt aralyǵynda uıym óńirdiń óneri men mádenıeti salasyndaǵy úrdister men qubylystardy zertteý, qujattaý fýnktsııalaryn oryndaıtyn ǵylymı-mádenı mekemege, mádenıettiń, bilim men ǵylymnyń damýyna oń áser etetin mýzeı toptamalarynyń qoımasyna aınaldy.
«Búginde mýzeı kollektsııasynda 6200-den astam keskindeme, grafıka, músin, sándik-qoldanbaly jáne teatrlyq-dekoratsııalyq óner týyndylary bar. 2022 jyly Pavlodar oblystyq kórkemsýret mýzeıine Baıanaýyl aýdanynyń týmasy, Qazaqstannyń Halyq sýretshisi, Qazaq KSR Memlekettik syılyǵynyń laýreaty Naǵymbek Nurmuhammedovtyń esimi berildi. Mýzeı qorynda sýretshiniń 31 týyndysy saqtalǵan, onyń 6 týyndysyn sýretshiniń otbasy mýzeı qoryna tabystady», - dep atap ótti mýzeı basshysy Aqertis Soltanbaev.
Eske sala keteıik, Qanysh Sátbaev pen Kemel Aqyshevtiń birge túsken fotosýretteri tabyldy.
