Qyrǵyzstannyń eńbek mıgranttaryna parlament saılaýyna qatysýǵa ruqsat berilýi múmkin
ASTANA. KAZINFORM - Qyrǵyzstanda parlament saılaýyna qatysý erejelerin ózgertý josparlanyp otyr, dep habarlaıdy Kazinform agenttiginiń Bishkektegi menshikti tilshisi.
Tıisti zań jobasy qoǵamdyq talqylaýǵa shyǵaryldy.
Túzetýlerge sáıkes, reforma kandıdattar úshin qarjylyq kedergilerdi azaıtýǵa, halyqaralyq tájirıbesi bar mamandardy tartýǵa jáne daýys berý formatyn ózgertýge baǵyttalǵan.
Usynys boıynsha depýtattyqqa kandıdattar úshin elde mindetti túrde 5 jyl turaqty turý talaby tolyq alyp tastalady. Bul parlamentke eńbek mıgranttary men ınvestorlardyń jolyn ashýy tıis.
Zań jobasynda saılaý qorlarynyń shekti mólsherin eki ese — 20 mln somnan 10 mln somǵa deıin qysqartý, saılaý jarnasyn 50%-ǵa — 300 myń somnan 150 myń somǵa deıin azaıtý kózdelgen. Sonymen qatar úgit júrgizýshi bir saılaý okrýgi sheginde tek bir kandıdatpen nemese bir saıası partııamen ǵana kelisimshart jasaı alady.
Eger kandıdat teledebatqa kelmese, oǵan tıesili efır ýaqyty qaıtarymsyz túrde basqa qatysýshylar arasynda bólinedi.
Bastamashylardyń aıtýynsha, bul ózgerister saılaý úderisiniń ádildigi men básekelestigin arttyrýǵa, sondaı-aq kandıdattardyń qarjylyq múmkindigine qaramastan olardyń qatysýyna keńirek múmkindik berýge baǵyttalǵan.
Eske salsaq, 2025 jyly Qyrǵyzstanda Jogorký Kenesh depýtattaryn saılaý rásimin jetildirýge baǵyttalǵan konstıtýtsııalyq zańǵa qol qoıylǵan.
Osyǵan deıin habarlaǵanymyzdaı, Qyrǵyzstanda el basshylarynyń bir mezgilde shetelde bolýyna tyıym salyndy.
