Qyrǵyzstannyń eks-prezıdenti energetıka salasyndaǵy daǵdarysqa bılikti kinálady
ASTANA. KAZINFORM — Qyrǵyzstannyń burynǵy prezıdenti Almazbek Atambaev eldegi energetıka salasyndaǵy daǵdarysqa bılikti kinálap, Sadyr Japarovtyń aıyptaýlaryn jalǵan dep atady. Eks-prezıdent maınıng-fermalar men basqarý qatelikteri daǵdarysty tereńdetkenin málimdedi, dep jazady Kazinform.
Qyrǵyzstannyń eks-prezıdenti Almazbek Atambaev Facebook-tegi jazbasynda qazirgi bıliktiń energetıka salasyna qatysty málimdemelerine jaýap berip, Sadyr Japarov bastaǵan basshylyqty shynaıy jaǵdaıdy burmalap otyr dep aıyptady.
Ol prezıdent Japarovtyń ózi baqylaýynda ekenin moıyndaǵan eki maınıng-ferma — sonyń ishinde Qambar-Ata-2 mańyndaǵy nysan elektr tapshylyǵyna eleýli úles qosqanyn atap ótken. Atambaev bul nysandardyń Maksım Bakıev pen Alekseı Shırshovqa jaqyn tulǵalarmen baılanysy bar ekenin de aıtty.
Eks-prezıdent sondaı-aq alǵashqy iri energetıkalyq daǵdarystyń Bakıev tusynda bastalǵanyn eske saldy.
— Ol kezde jaǵdaı qazirgiden de aýyr bolatyn. Energoaınalym joq, jylý elektr stantsııasy tozǵan. Jaryq táýligine 8-10 saǵatqa deıin jıi óshetin, — dedi Atambaev.
Onyń aıtýynsha, 2010 jyldan keıin energetıkter men ınjenerlerdiń eńbegi arqasynda saladaǵy máseleler birneshe jylda sheshile bastaǵan.
Eske salsaq, Qyrǵyzstanda 2023 jyldyń 1 tamyzynan bastap 2026 jyldyń 31 jeltoqsanyna deıin energetıka salasynda tótenshe jaǵdaı rejımi engizilgen.
2025 jyldyń qyrkúıeginde energetıka mınıstri Taalaıbek Ibraev aldaǵy qys maýsymynyń sońǵy jyldardaǵy eń kúrdelisi bolatynyn eskertip, azamattardy elektr energııasyn únemdeýge shaqyrǵan bolatyn. Qazir el tutynatyn elektr kólemi óndiris múmkindiginen asyp túsedi. Tapshylyq kórshi elderden ımport arqyly jabylyp otyr.
Únemdeý sharalary aıasynda memlekettik mekemelerde 18:00-06:00 aralyǵynda jaryqtandyrý men elektr qurylǵylaryn paıdalanýǵa shekteý qoıyldy. Mektepterde de arnaıy rejım engizilgen.
Al Bishkektegi barlyq mádenı-oıyn-saýyq obektileri «tynyshtyq týraly» zań talaptary jáne energııa únemdeý maqsatynda saǵat 22:00-den keıin jumys istemeıdi.