Qyrǵyzstannyń eks-prezıdenti Almazbek Atambaevtyń uly bas bostandyǵynan aıyryldy
ASTANA. KAZINFORM — Bishkektiń Pervomaı aýdandyq soty bılikti kúshpen basyp alýǵa qatysty qylmystyq is boıynsha úkim shyǵardy. Іske Qyrǵyzstannyń burynǵy prezıdenti Almazbek Atambaevtyń uly Qadyr Atambaevty qosa alǵanda, «Sotsıal demokrattar» partııasynyń ókilderi aıyptalýshy retinde tanylǵan. Bul týraly Kazinform agenttiginiń Bishkektegi menshikti tilshisi habarlaıdy.
Sot otyrysy jabyq rejımde ótti.
Jergilikti BAQ-tyń málimetinshe, Qadyr Atambaev 4 jylǵa bas bostandyǵynan aıyryldy. Onyń múlki tárkilenip, jazasyn jalpy rejımdegi túzeý kolonııasynda óteý belgilendi.
Aıyptalýshylardyń qatarynda «Sotsıal demokrattar» partııasynyń jetekshisi Temırlan Sultanbekov te bar. Oǵan 7 jyl bas bostandyǵynan aıyrý jazasy taǵaıyndalyp, múlkin tárkileý jáne jazasyn jalpy rejımdegi túzeý kolonııasynda óteý týraly úkim shyǵaryldy.
Eske sala keteıik, qylmystyq is 2025 jyldyń qarasha aıynyń sońynda qozǵalǵan. Qyrǵyz Respýblıkasy ІІM-niń nusqasy boıynsha, is boıynsha aıyptalǵandar Jogorký Keneshke ótken merziminen burynǵy saılaýdyń qorytyndysy shyǵarylǵannan keıin jappaı tártipsizdikter men narazylyq aktsııalaryn uıymdastyrýdy josparlaǵan.
2025 jylǵy maýsymda Bishkektiń Pervomaı aýdandyq soty Qyrǵyz Respýblıkasynyń burynǵy prezıdenti Almazbek Atambaevty 2019 jylǵy tamyzda Qoı-Tashta bolǵan oqıǵalarǵa baılanysty syrttaı 11 jyl 6 aıǵa bas bostandyǵynan aıyrýǵa, múlkin tárkilep, memlekettik nagradalarynan aıyrýǵa úkim shyǵarǵany habarlanǵan edi.
Sonymen qatar 2025 jylǵy jeltoqsanda Qyrǵyzstan prezıdenti Sadyr Japarov Almazbek Atambaevty barlyq memlekettik nagradalarynan aıyrý týraly jarlyqqa qol qoıdy.
