Qyrǵyzstannyń eks-depýtaty Shaırbek Tashıev 16 mamyrǵa deıin qamaýǵa alyndy
BІShKEK. KAZINFORM — Qyrǵyzstanda UQMK burynǵy basshysynyń inisi Shaırbek Tashıev 16 mamyrǵa deıin qamaýda otyrady. Bul týraly «Kabar» agenttigine Bishkek qalasynyń Pervomaı aýdandyq soty habarlaǵan.
Qolda bar málimetke sáıkes, 2 sáýir kúni ótken sot otyrysynda Shaırbek Tashıevti bir aı merzimge №1 tergeý ızolıatoryna (SIZO-1) qamaý týraly sheshim qabyldanǵan.
Buǵan deıin Qyrǵyzstan Іshki ister mınıstrligi eks-depýtattyń «Qyrǵyzneftegaz» ashyq aktsıonerlik qoǵamyndaǵy jemqorlyq isi aıasynda ustalǵanyn habarlaǵan.
14 naýryzda Shaırbek Tashıev depýtattyq mandatynan óz erkimen bas tartty. Qyrǵyz Respýblıkasynyń Ortalyq saılaý komıssııasy onyń depýtattyq ókilettigin merziminen buryn toqtatty.
Eske sala ketsek, 10 aqpanda Qyrǵyzstannyń UQMK basshylyq quramynda aýys-túıis boldy. Qamchybek Tashıev mınıstrler kabıneti tóraǵasynyń orynbasary – Ulttyq qaýipsizdik jónindegi memlekettik komıtettiń tóraǵasy qyzmetinen bosatyldy.
Ulttyq qaýipsizdik jónindegi memlekettik komıtettiń basshysy aýystyrylǵannan keıin tóraǵanyń úsh orynbasary da qyzmetinen bosatyldy.
Keıinnen Qyrǵyzstan prezıdenti sońǵy kadrlyq sheshimder neden týyndaǵanyn túsindirdi.
Ol sondaı-aq UQMK burynǵy basshysymen aradaǵy kelispeýshilik týraly túsinik berdi.
