Qyrǵyzstannyń Cholpon-Ata qalasyna ShYU-nyń mádenı astanasy mártebesi berildi

ASTANA. KAZINFORM – Ystyqkól jaǵalaýynda ornalasqan Cholpon-Ata qalasyna ShYU-nyń 2025-2026 jyldardaǵy týrızm jáne mádenı astanasy degen mártebe berildi, dep habarlaıdy Kazinform agenttiginiń menshikti tilshisi.

Qyrǵyzstan prezıdenti Sadyr Japarov Tıantszınde ótken ShYU-ǵa múshe memleketter basshylary keńesinde eldiń uıymǵa tóraǵalyǵy kezeńine arnalǵan josparlaryn tanystyrdy. Olardyń qatarynda Ystyqkól «ıntellektýaldyq» forýmy men Dúnıejúzilik kóshpendiler oıyndary bar.

Sadyr Japarov eldiń ShYU-na tóraǵalyǵy kezinde basymdyq beriletin baǵyttardy atady.

Ol Qyrǵyzstannyń tóraǵalyǵy «ShYU-na 25 jyl: turaqty álem, damý men gúldenýge birge» atty uranymen ótip, mynadaı máselelerge basymdyq beriletinin atap ótti:

· Uzaqmerzimdi turaqtylyqty qamtamasyz etý. Terrorızm, separatızm jáne ekstremızmge qarsy kúreske erekshe nazar aýdarylyp, Qyrǵyzstan bastamasymen Bishkekte qurylatyn transulttyq uıymdasqan qylmysqa qarsy kúres ortalyǵy ShYU keńistigindegi qaýipsizdikke úles qospaq.

· Ekonomıkalyq yntymaqtastyqty damytý. Uıym aıasynda tıimdi qarjylyq tetikterdi qurý, sonyń ishinde ShYU Damý bankin, Damý qoryn jáne Investıtsııalyq qordy qurý usynyldy.

· Kólik jáne logıstıka. Halyqaralyq avtokólik jáne temirjol tasymaldaryna qolaıly jaǵdaı jasaý, jańa baǵyttar ashý jáne múshe memleketterdiń tranzıttik áleýetin tıimdi paıdalaný josparlanyp otyr.

· Tsıfrlandyrý. Jastardyń tsıfrlyq forýmyn ótkizý usynylyp, ortaq tsıfrlyq transformatsııaǵa baǵyttalǵan bastamalarǵa Qyrǵyzstan úles qospaq.

· Klımat jáne jasyl ekonomıka. Klımattyń ózgerýine qarsy kúreste jáne «jasyl» jobalardy ilgeriletýde yntymaqtastyqty kúsheıtý kózdelgen.

Kelesi ShYU sammıti 2026 jyly Bishkekte ótedi.

Aıta keteıik, keshe Qytaıdyń Tıantszın qalasynda ShYU sammıti ótti.

Oǵan Memleket basshysy Qasym-Jomart Toqaev qatysty.