Qyrǵyzstannyń burynǵy prezıdenti Almazbek Atambaev memlekettik marapattarynan aıyryldy
BІShKEK. KAZINFORM – Qyrǵyzstan prezıdenti Sadyr Japarov Almazbek Atambaevty barlyq memlekettik marapattarynan aıyrý týraly jarlyqqa qol qoıdy, dep habarlaıdy Kazinform menshikti tilshisi.
Sheshim Bishkek qalasy Pervomaıckıı aýdandyq sotynyń 2025 jylǵy 3 maýsymdaǵy úkimi boıynsha qabyldandy.
Qujatqa sáıkes, eldiń burynǵy prezıdenti ózine berilgen Qyrǵyz Respýblıkasynyń memlekettik marapattarynan aıyryldy:
* Qyrǵyz Respýblıkasynyń eń joǵary dárejeli «Qyrǵyz Respýblıkasynyń Batyry» belgisi;
* II dárejeli Manas ordeni;
* «Danaker» ordeni;
* «Dańq» medali.
Sonymen qatar, Qyrǵyz Respýblıkasy prezıdentiniń osy marapattar berilgen jarlyqtary kúshin joıdy.
Qyrǵyz Respýblıkasy Bas prokýratýrasy janyndaǵy Sot oryndaýshylary qyzmetine belgilengen tártippen memlekettik marapattar men olarǵa ilespe qujattardy keıinnen memlekettik marapattar qoryna aýdarý úshin tárkileý sharalaryn qabyldaý tapsyryldy.
Eske sala ketsek, 2025 jyldyń maýsym aıynda Bishkektiń Pervomaıskıı aýdandyq soty Qyrǵyzstannyń eks-prezıdenti Almazbek Atambaevty 2019 jyldyń tamyzynda Qoı-Tash oqıǵasyna baılanysty múlkin tárkilep, memlekettik nagradalarynan aıyrý arqyly 11 jyl 6 aıǵa bas bostandyǵynan aıyrýǵa syrttaı úkim shyǵardy.
Buǵan deıin Qyrǵyzstannyń eks-prezıdenti energetıka salasyndaǵy daǵdarysqa bılikti kinálaǵanyn jazǵan edik.