Qyrǵyzstannyń burynǵy prezıdenti Almazbek Atambaev 11 jylǵa sottalýy múmkin
ASTANA.KAZINFORM - Bishkekte 2019 jyldyń tamyzyndaǵy Qoı-Tash oqıǵasy boıynsha sot protsesi jalǵasýda. Іs boıynsha aıyptalýshylardyń arasynda Qyrǵyzstannyń burynǵy prezıdenti Almazbek Atambaev, burynǵy depýtattar men birqatar sheneýnik bar, dep habarlaıdy Kazinform menshikti tilshisi.
Bishkek jylý elektr ortalyǵyna kómir jetkizý, jer telimin zańsyz ıemdený boıynsha qylmystyq ister bir óndiriske biriktirilgeni habarlandy.
Memlekettik aıyptaý aıyptalýshy tarapty kináli dep tanyp, Qyrǵyz Respýblıkasynyń burynǵy prezıdenti Almazbek Atambaevty 11 jylǵa, Ulttyq qaýipsizdik memlekettik komıtetiniń toǵyzynshy qyzmetiniń burynǵy qyzmetkeri Qanat Saǵymbaevty 11 jylǵa, Jogorký Keneshtiń burynǵy depýtaty Ravshan Jeenbekovti, Prezıdent Ákimshiliginiń burynǵy múshesi Farıda Nııazova jáne «Sotsıal demokrattar» partııasynyń múshesi Farhat Baabıevti 10 jylǵa bas bostandyǵynan aıyrýdy surady.
Prokýrorlar Ásel Kodýranova, Irına Karamýshkına, Qundyz Joldýbaeva jáne Meerbek Mıskenbaevqa úsh jyl synaq merzimin surady.
Aıta keteıik, 2019 jyldyń 7 tamyzynda Bishkek irgesindegi Qoı-Tash aýylynda Qyrǵyzstannyń burynǵy prezıdenti Almazbek Atambaevty ustaý boıynsha arnaıy operatsııa júrgizilgen bolatyn. Respýblıkanyń burynǵy prezıdentiniń úıinde atys bolǵan. Saldarynan Qyrǵyzstan Densaýlyq saqtaý mınıstrliginiń málimetinshe, túrli jaraqattarmen Bishkektegi aýrýhanalar men Shý oblystyq birikken aýrýhanasyna zardap shekken 45 adam jatqyzylǵan.
2019 jylǵy 8 tamyzda el Qaýipsizdik keńesiniń otyrysynda Qyrǵyz Respýblıkasynyń Prezıdenti Sooronbaı Jeenbekov Almazbek Atambaev zań aıasynda júrgizilgen tergeý sharalaryna qarýly qarsylyq kórsetip, Qyrǵyz Respýblıkasynyń Konstıtýtsııasy men zańdaryn óreskel buzdy dep málimdedi.
Sol kúni Almazbek Atambaevty tártip saqshylary ustady. 9 tamyzda A.Atambaevqa qatysty bultartpaý sharasy tańdaldy - ol 26 tamyzǵa deıin qamaýǵa alyndy. 2019 jyldyń 7-8 tamyzynda Qoı-Tashta bolǵan oqıǵa aıasynda burynǵy prezıdent Almazbek Atambaevtyń sybaılastaryna qatysty 8 qylmystyq is qozǵaldy.