Qyrǵyzstannyń basshylyǵyna qastandyq jasamaq bolǵan transulttyq uıymdasqan qylmystyq top músheleri ustaldy
ASTANA. KAZINFORM — Qyrǵyz Respýblıkasynyń Ulttyq qaýipsizdik memlekettik komıteti (UQK) Qyrǵyzstan basshylyǵyna qastandyq jasamaq bolǵan transulttyq uıymdasqan qylmystyq top múshelerin ustady, dep habarlady Kabar agenttigi.
Agenttiktiń málimetinshe, shetel azamattary men memleketaralyq izdeýde bolýy múmkin tulǵalardyń arasynan uıymdasqan qylmystyq toptardyń zańsyz áreketterin anyqtaý jáne jolyn kesýge baǵyttalǵan jedel is-sharalardy uıymdastyrý barysynda transulttyq uıymnyń músheleri sanalatyn Ázerbaıjannyń 5 azamaty anyqtaldy.
Alynǵan jedel derekke sensek, qylmys áleminde «qańǵybas» degen laqap atymen belgili M. O. Asgarov qylmystyq ortany nyǵaıtý jáne urylar ıdeologııasyn taratý, sondaı-aq óziniń mártebesin arttyrý maqsatynda memleket júrgizip jatqan OPG-ǵa qarsy belsendi kúres saıasatyna baılanysty el basshylyǵyna qastandyq jasaý úshin seriktesterimen qyrǵyz aýmaǵyna kelgen.
Osyǵan baılanysty Qyrǵyz Respýblıkasynyń Ulttyq qaýipsizdik memlekettik komıteti 2024 jylǵy 22 naýryzda jedel-izdestirý sharalaryn júrgizip, nátıjesinde joǵaryda atalǵan tulǵalardyń barlyǵy ustaldy. Qazirgi ýaqytta olardy Qyrǵyz Respýblıkasynyń zańnamasyna sáıkes jaýapkershilikke tartý boıynsha jedel-izdestirý sharalary júrgizilip jatyr.
