Qyrǵyzstannan kelgen júk kólikteri ne sebepti keri qaıtaryldy
QR Qarjy mınıstrligi Memlekettik kirister komıteti bıyl tamyz aıynda Qazaqstan men Qyrǵyzstan shekarasynda ne sebepti júk kólikteriniń keptelesi bolǵanyn túsindirdi, dep habarlaıdy QazAqparat tilshisi.
Málim etilgendeı, EAEO aýmaǵynda kóleńkeli taýar aınalymyna jol bermeý maqsatynda Memlekettik kirister komıteti kórshiles elderdiń jaýapty organdarymen birlese tıisti tekserýlerdi turaqty ótkizip keledi.
«Qazaqstan men Qyrǵyzstannyń fıskaldy organdarynyń ózara is-qımyly men baqylaýyn kúsheıtý maqsatynda 2022 jylǵy 8-9 qyrkúıekte Bishkek qalasynda eki el arasyndaǵy saýda-ekonomıkalyq yntymaqtastyq jónindegi jumys tobynyń ekinshi otyrysy ótti. Atalǵan otyrysta Qyrǵyzstannan Qazaqstanǵa taýarlardyń ımportyn júzege asyrý barysynda ımporttalatyn taýarlarǵa elektrondy shot-faktýralardyń bolmaýy anyqtalǵan jaǵdaıda, júk kólikterin qyrǵyz jaǵyna keri qaıtarý jóninde sharalar qabyldaıtyndyǵy bekitilgen. Bul rette qabyldanǵan sharalardyń nátıjesinde 2022 jyldyń qyrkúıeginen bastap 2023 jyldyń 20 qyrkúıegine deıin Qyrǵyz Respýblıkasyna 110 kólik keri qaıtaryldy», – delingen QR Qarjy mınıstrligi Memlekettik kirister komıtetiniń «QazAqparat» agenttigine bergen jaýabynda.
Bıylǵy 19-20 tamyz aralyǵynda qazaq-qyrǵyz shekarasynda Qyrǵyzstan jaǵynan júk kólikteriniń keptelisi baıqalǵan bolatyn.
«Keptelis jemis-kókónis ónimderin Qyrǵyzstannan alyp ótý kezeńinde júk aǵynynyń ulǵaıýyna, sondaı-aq jazǵy kezeńde jolaýshylar aǵynynyń artýyna baılanysty boldy. Sonymen qatar Qazaqstan Respýblıkasy Ulttyq qaýipsizdik komıtetiniń Shekara qyzmeti shekara keńistiginde, onyń ishinde avtokólik ótkizý beketterinde zań buzýǵa jol bermeý baǵytynda tıisti is-qımyl sharalaryn iske asyryp otyr. Qazir ótkizý pýnkteri shtatty rejımde jumys istep jatyr, táýligine shekarany ortasha eseppen 350-400 júk kóligi kesip ótýde», – dep naqtylady Memlekettik kirister komıtetiniń mamandary.
Sondaı-aq eki el arasynda qandaı taýarlar aınalymy júzege asyrylyp otyrǵany málim etildi.
«Qazaq-qyrǵyz shekarasynda ornalasqan «Aısha bıbi», «Aýhatty», «Sortóbe», «Sypataı batyr», «Qara sý», sondaı-aq «Qordaı» avtokólik ótkizý beketinen kelgen málimetterge sáıkes, bıylǵy jyl basynan Qyrǵyz Respýblıkasynan Qazaqstan Respýblıkasyna negizinen myna taýarlar tasymaldandy: kókónis pen jemis, qurylys materıaldary, metall taýarlar, azyq-túlik, sút jáne kondıterlik ónimder. Sonymen qatar Qazaqstan Respýblıkasynyń aýmaǵynan tranzıt arqyly Qyrǵyz Respýblıkasynan Reseı Federatsııasyna baǵyttalǵan júk kólikteriniń úlesi 57% qurady», – dep atalyp ótken vedomstvo málimetinde.
Budan buryn habarlanǵandaı, jaqynda QR Ulttyq qaipsizdik komıteti shekarada bir júk kóligin tekserýge 25 mınýt ýaqyt qarastyrylǵanyn málim etti.
Bıylǵy tamyz aıynda Qazaqstan men Qyrǵyzstan shekarasyndaǵy baqylaý-ótkizý pýnktinde júk kólikteri jınalyp qalǵan bolatyn.
