Áskerde soqqyǵa jyǵylǵan aqtaýlyq sarbazdyń anasy ulynyń jaǵdaıy týraly aıtty
AQTAÝ. KAZINFORM – Aqtóbede áskerı boryshyn ótep júrip, soqqyǵa jyǵylǵan aqtaýlyq sarbazdyń jaǵdaıy belgili boldy. 18 jastaǵy Erkebulan Dosymbettiń ata-anasy qazir onyń janynda, aýrýhanada.
-Kózi shúńireıip, saqal-murty ósip ketken, qatty júdepti. Kıimi óte las, qoqystan taýyp alǵandaı kórinedi. Aýystyratyn kıim de ákelmegen. Fızıkalyq ta, emotsıonaldyq ta jaǵdaıy óte aýyr. Jalpy, qaraýsyz qalǵan adam sııaqty kórindi, - deıdi sarbazdyń anasy Gúldana Ketibaeva.
Onyń aıtýynsha, keıin sarbazǵa áskerı bólimnen aýystyratyn kıim ákelingen.
Gúldana Ketibaeva ulynyń densaýlyǵyna alańdap otyr. Sebebi, sarbaz ózdiginen zár shyǵara almaı, kateter qoıylǵan.
-Ulymnyń shap tusyna soqqy jasalǵan. Sodan keıin jaǵdaıy nasharlap, dárethanaǵa qalypty bara almaı qalǵan. Eki táýlik boıy zár shyǵara almaı, ony Aqtóbe oblystyq aýrýhanasyna jetkizgen, - deıdi anasy.
Osy oqıǵaǵa qatysty áskerı prokýratýra Qazaqstan Respýblıkasy Qylmystyq kodeksiniń 451-baby 1-bóligi boıynsha - bılikti nemese qyzmettik ókilettikterdi asyra paıdalaný deregi boıynsha qylmystyq is qozǵaǵan.
Aıta keteıik, atalǵan bap boıynsha 5 myń aılyq eseptik kórsetkishke deıin aıyppul salý, sol mólsherde túzeý jumystaryna tartý, bes jylǵa deıingi merzimge bas bostandyǵyn shekteý nemese dál sol merzimge bas bostandyǵynan aıyrý jazasy qarastyrylǵan.
Qazirgi ýaqytta sarbazdyń anasy ulynyń janynda.
Buǵan deıin, Aqtaýlyq sarbazdan áskerı bólimdegi uryp-soǵýǵa qatysty shaǵym túsken bolatyn.
